Madaxii qaraxyadda Al-Shabaab ee Shabeellaha Hoose oo "la dilay"

MUQDISHO, Soomaaliya – Warbaahinta ku hadasha afka Dowladda Soomaaliya ayaa maanta baahisay in la dilay sarkaal sarre oo ka tirsanaa Al-Shabaab.

Maxamed Cusmaan Baluush ayaa la sheegay in uu ahaa madaxii qaraxyadda ururka gacansaarka la leh Al-Qaacida ee Shabeellaha Hoose.

Wakaalada wararka Qaranka oo warkaan faafisay ayaa shaacisay in howlgalka lagu dilay ninkaan uu ka dhacay degmada Wanlaweyn ee gobolkaas.

"Horjoogahan ayaa markii uu arkay ciidamadda lasoo baxay qori AK 47 isla markaana dagaalamay," ayay SONNA tiri, iyaddoo soo xigatay saraakiil.

Dhinaca kale, ma jiro wax war ah oo ku aadan sheegashadan oo illaa iyo haatan kasoo baxay dhanka dagaalameyaasha hubeysan ee Al-Shabaab.

Warkaan ayaa kusoo aadaya iyaddoo ay jireen warbixino ku aadan in ciidamadda ay xaafada Xudurweyne ee degmadaas ku dileen nabadoon.

Goobjoogeyaal ayaa qadka telefoonka ugu sheegay warsidaha Garowe Online in ciidamada ay horey u qaateen meydka Baluush.

Waa kuwa Maxamed Baluush?

Sidda ay sheegtay SONNA, Baluush ayaa bedelay Maxamed Siidow oo lagu dilay duqeyn uu Mareykanka fuliyey 28-kii December, sanadkii 2019.

Weerarkaas dhanka cirka ah ayaa la wariyey in uu ka dhacay tuulada Caaliyow Boorow ee isla gobolkaas.

Ismaacil Cabdi Maalik, taliyaha kumaandooska Soomaaliya, ayaa ku adkeystay in Baluush uu mas'uul ka ahaa qaraxyo lagu dilay shacab iyo askar.

"Dhagar-qabahani wuxuu ahaa dhiig cab rayid laayey," ayuu ku daray, isagoo aan ka jawaabin in ciidamo Mareykan ah ay qayb ka ahaayeen howlgalka.

Shabeellaha Hoose ayaa wuxuu kamid yahay gobolada ay joogitaanka badan ku leedahay Al-Shabaab lagana soo abaabulo falal khaarijinta iyo qaraxyada.

GAROWE ONLINE