Madaxweynaha JFS oo ku qarinaya dagaalka lagula jiro argagixisada codadka siyaasiyiinta diiday "dastuurka cusub"

Madaxweynaha oo saakay ka baxay Muqdisho ayaa tegay jiidaha hore ee dagaalka AS.

Muqdisho, Soomaaliya - Madaxweynaha JFS Xasan Sheekh Maxamuud iyo wafdi uu hogaaminayo ayaa maant gaaray degmada Ceeldheer ee gobolka Galgaduud.

Wafdiga madaxweynaha ayaa waxaa qeyb ka ah madaxweynaha Galmudug, xildhibaano, wasiirrada gaashaandhigga iyo arrimaha gudaha, taliyaha ciidanka xoogga dalka iyo saraakiil kale.

Sidoo kale, Xildhibaan Maxamed Cajiib iyo Xildhibaan Yaasiin Farey ayaa degmada Ceeldheer uga sii horeeyey wafdiga, iyaga oo madaxweynaha ku soo dhaweeyay magaalada.

Madaxweyne Xasan Sheekh iyo masuuliyiinta uu hoggaaminayo oo saakay ka baxay Muqdisho ayaa tegay degmada Xarardheere ee gobolka Mudug, isaga ciidamada, maamulka iyo shacabka degmada Xarardheere ku dhiirigeliyey dagaalka ay kula jiraan AS.

Dadka aqoonta durugsan u leh siyaasadda ayaa socdaalkan u aaneynaya isku day lagu doonayo in lagu daboolo diidmada baaxadda leh ee hanaanka loo maray meelmarinta 4ta Cutub ee dastuurka, iyadoo looga hortagayo fikradda ah “la dagaallanka argagixisada.”

GAROWE ONLINE