Ganacsadde caan ah oo lagu toogtay magaaladda Kismaayo

KISMAAYO, Jubaland – Koox ku hubeysan Bastoolado ayaa fiidnimadii Axadda xaafadda Calanley ee magaalada Kismaayo, gaar ahaan halka loo yaqaano Sarta-Calaaca ku toogtay Oday dhaqameed si weyn loo yaqiinay.

Goobjoogeyaal ayaa u sheegay warsidaha Garowe Online in ciidamadda ammaanka ay falka kadib baaritaano ka bilaabeen aagaas.

Xaaji Saciid Ciise Adoon, xubin ka tirsanaa ergaddii doorashadda ahaana ganacsadde ayaa dilkii wuxuu noqonayaa midkii ugu dambeeyay ee lagu beegsanayo Salaadiinta dowlad goboleedka Jubbaland.

Gacan ku dhiigleyaasha falka sameeyay oo durba meesha ka baxsaday ayaa lagu raad-jooga, sidda uu sheegay Taliska Booliska magaaladda oo si kooban ula hadlay mareega GO.

Ma jirto koox dusha saaratay mas'uuliyadda falkan. Hase ahaatee, waxaa dhacdooyinka noocaan ah looga bartay xoogaga xiriirka la leh Al-Qaacida ee Al-Shabaab.

Mas'uuliyiinta maamulka xaruntiisu tahay Kismaayo oo cambaareeyay beegsiga mas'uulkan ayaa tacsi waxay u direen eheladda marxuumka oo ay u rajeeyeen bedel fiican.

Waa falkii labaad oo ka dhan ah Nabadoonadda oo kaliya Soomaaliya ka dhaca muddo 24-saac gudaheeda ah. Ibrahim Maxamed Ibraahim ayaa lagu khaarijiyey magaaladda Afgooye ee gobolka Shabeellaha Hoose.

GAROWE ONLINE