Sacuudiga oo dib u furey safaaradiisa Muqdisho
-
Garowe Online
- Posted On 19-11-2021, 08:58PM
MUQDISHO, Soomaaliya - Sacuudiga ayaa ku dhawaaqey inuu dib u furey Safaaradiisa Caasimadda Soomaaliya kadib tobanaan sano oo xirnayd.
Wakaaladda Wararka Sacuudiga ee Saudi Press Agency [SPA], oo soo xiganeysa Wasaaradda Arrimaha Dibadda dalkaasi ayaa sheegtay in Safaaradda oo mudo ku shaqeynaysa Kenya, loo wareejiyay Muqdisho.
Bishii June, wafdi ka socday Sacuudiga, ayaa yimid Muqdisho, kaasoo diyaarinayay dib u furitaanka safaaradda, waxaana Boqor Salam usoo magacaabey Ahmed Bin Mohamed Al-Muwallad inuu noqdo safiirka cusub ee u fadhiya Soomaaliya.
Al-Muwallad waa safiirkii labaad ee Sacuudiga u soo magacaabo Soomaaliya tan iyo burburkii dowladdii dhexe ee Soomaaliya sanadkii 1991.
Dr. Maxamed Cabdi-kani Al-Khayat ayaa bishii Janaayo ee sanadkii 2017 warqadihiisa aqoonsiga ka guddoomay Madaxweyne Xasan Sheekh Maxamuud.
Sacuudiga iyo xulufadiisa Imaaraadka ayaa hoos u dhigay xiriirkooda Soomaaliya kadib markii uu Farmaajo la saftay Qatar, oo la sheegay inay maalgelisay doorashadiisii Feb 2017.
GAROWE ONLINE
