Saddex qof oo lagu dilay Buurgaabo Jubbada hoose
-
- Posted On 19-03-2016, 01:06PM
BUURGAABO- Mallayshiyaad katirsan kooxda Al-Shabaab ayaa deegaanka Buurgaabo gobolka Jubbada hoose ku dilay saddex ruux oo shacab, waxaana sidoo kale la dhaawacay lix kale kadib markii ay rasaas ku fureen xilli ay ku jireen shaqo ku salaysan waxyaabaha ay kasoo saartaan nolol maalmeedkooda.
Dadka dhintay, ayaa goob joogayaal aan la xiriirnay noo sheegeen inay ku guda jireen jarista dhir ay ka samaystaan dhuxusha, waxaana arrintani timi mallayshiyaadka Shabaab deegaanada gacanta ku hayaan gobolkaasi ka mamnuuceen tallaabadan dadku qaadeen.
Deegaanka Buur-gaabo, waxa uu ilaa 240 KM dhinaca koonfur galbeed uga beegan yahay magaalada Kismaayo.
Waa markii ugu horaysay gobolka la shaaciyo dad loo toogtay arrin ku aadan dhuxusha.
Lama garanayo sababta iyo danta Shabaab ka leeyihiin mamnuucista in la jaro dhirta dhuxusha laga sameeyo, balse waxay ku aadaysaa xilii warbixin sanadkii 2014kii soo saartay Qaramada Midoobey ayaa lagu sheegay in hal milyan oo jawaan oo dhuxul ah la dhoofiyay iyadoo ciidamada Kenya ay goobjoog ahaayeen, dhuxushaas oo horey u tiilay dekedda Kismaayo.
Go'aanka Qaramada Midoobay majirto cid u hogaansantay, balse waxaa weli deegaano katirsan Somalia si qarsoodi ah looga dhoofiyaa dhuxusha.
GAROWEONLINE
