Soomaaliya: Aqalka Sare oo hakiyay Dhexdhexaadinta Gollaha Shacabka

MUQDISHO, Soomaaliya - Guddiigii Aqalka Sare ee loo xil-saarey xalinta Khilaafka Gollaha Shacabka, ayaa joojiyay dhex-dhexaadintii uu wadey, kadib markii ay mira-dhal noqon waysay.

Go'aanka ayaa yimid kadib markii ay iscasileen saddex kamid ah xubnaha, oo kala ah Maxamud Axmed Maxamud (Mashruuc), Maxamed Amiin Sheekh Cismaan iyo Cabdi Xasan Cawaale [Qeybdiid].

Guddiga oo ka koobnaa 7 xubnood, oo uu gudoomiye u yahay Cabdi Xaashi Cabdullaahi, ayaa la magacaabay 17-kii bishan, si ay xal waara ugu helaan Khilaafka siyaasadeed ee u dhaxeeya gudoonka Gollaha Shacabka iyo Xildhibaanada.

Xalay ayuu shaaciyay Guddiga inay fashilantay waan-waantii uu wadey, kadib markii kulamadii ay la qaateen dhinacyada isku haya Mooshinka Jawaari laga keenay ay noqdeen kuwa mira-dhali waayay, oo ismariwaaga jira uu yahay mid aysan xal u heli karin. Halkan ka akhri.

Garabka Jawaari ayaa sheegay xalay inuu burburay Mooshinka, kadib markii waqtigii loo qabtey ee 10-ka maalmood lagu horkeeni waayay Gollaha Shacabka, iyadoo waqtigaasi ku ekaa 28-ka Maarso.

Khilaafka taagan ayaan la ogeyn halka uu caga-dhigan doono, iyadoo Xildhibaanada Gollaha Shacabka labo u kala jabeen, kuwa difaacaya Jawaari iyo kuwa taageera ka helaya Xafiiska Ra'iisul Wasaare Khayre oo doonaya inay xilka ka qaadaan gudoomiyaha.

GAROWE ONLINE