Soomaaliya: Qarax ka dhacay duleedka Muqdisho
-
Wariyaha Muqdisho GAROWE ONLINE
- Posted On 08-01-2018, 10:09AM
MUQDISHO, Soomaaliya - Qarax xooggan ayaa xalay ka dhacay deegaan ku yaalla duleedka magaalada Muqdisho, ee Caasimadda Soomaaliya.
Qaraxan oo ka dhashay miino wadada qarkeeda lagu aasay, ayaa lagula eegtay gaadiid dagaal oo ay la socdeen ciidamo katirsan Hay'adda Nabad Sugida Soomaaliya [NISA] deegaanka Ceelasha Biyaha.
Wararka ayaa sheegay in mid kamid ah gaadiidka ciidamada wateen uu qaraxa ku burburay, iyadoo khasaarooyin kala duwan kasoo gaarey Askartii saarnayd, inkasoo aan tirada rasmi ah la ogeyn.
Jugta qaraxa ayaa laga maqlay deegaanada ku yaalla nawaaxiga Muqdisho, waxaana wararku ay sheegayaan in ciidamada la beegsaday ay xireen wadada isku xirta Muqdisho iyo degmada Afgooye.
Al Shabaab ayaa sheegtay in 10 Askari oo kamid ahaa ciidamada NISA, gaar ahaan kuwa loo yaqaano ALPHA GROUP, ee Mareykanka uu tababaray.
Saraakiisha NISA kama aysan hadlin weerarkan iyo khasaaraha ka dhashay.
Ciidamada NISA ayaa baro koontarool oo lagu baaro gaadiidka ka yimaada gobollada dalka waxay ku leeyihiin duleedka magaalada Muqdisho, kuwaasi oo mararka qaara weeraro qaraxyo miinooyin u badan kala kulma Al Shabaab.
GAROWE ONLINE
