Saddex qodob oo ciidamada Danab uga duwan yihiin askarta kale
-
WARIYAHA MUQDISHO GAROWE ONLINE
- Posted On 10-12-2022, 07:56AM
MUQDISHO, Soomaaliya - Qeybo badan oo kamid ah dadka Soomaaliyeed ayaa "burcad" u arka qaar kamid ah ciidamada ammaanka marka laga reebo kumaandooska Danab, sidda ay ku warantey Washington Post.
Majaladan reer Mareykan ayaa warisay in cutubyada Ameerikaanku tababaro ay saddex arrimood uga duwan yihiin askarta kale ee Soomaaliya kuwaasoo haatan aragtida shacabka ka qabaan ay is-badaleyso.
Ciidamadda Danab oo xaruntoodu tahay xerada Balidoogle ee gobolka Shabeellaha Hoose ayaa waxay fuliyaan howlgalo gaar ah kuwaasoo lagu beegsado horjoogeyaasha ugu muhiimsan ee Al-Shabaab.
Mushaharka
Danab oo ka kooban 1,500 askari lana filayo in la kordhiyo bilooyinka soo aadan ayaa si joogto ah u hela mushaharkooda "taasoo sababaysa in aysan iibin hubkooda ama aysan baad ka qaadan shacabka".
Sanadkii 2020-kii, taliska kumaandooskan ayaa joojiyey in ay askarta kamid noqonaysa kasoo dhex-xushaan milatariga waxaana fursad loo siiyey dadweynaha in ay ku biiraan ciidamadan gaarka loo tababaro.
Korneyl Cabdullaahi Cali Beeryare, taliyaha Danab oo u waramay Washington Post ayaa caddeeyay in xubnaha kamid noqonaya ciidanka laga kala soo xulo qeybaha bulshadda "si loo ilaaliyo isku-dheelatirnaanta".
Saanadda
Inta lagu guda jiro tababarka, askari kasta oo ka tirsan Danab waxa uu xaq u leeyahay in ay qasnadiisa ugu jirto 30 xabadood, sidda uu sheegay Jim Maguire oo kamid ahaa tababareyaasha lana hadlay wargeyska.
Go'aankan ayaa u muuqda mid looga hortagayo in askarta ay ka ganacsadaan ama ay "xadaan" rasaasta la siiyo taasoo horey looga soo wariyo qeybo kale oo kamid ah ciidamadda Soomaaliya.
Inta illaa haatan la og-yahay, shirkadda Bancroft ayaa maamusha tababarka ciidamadda Soomaaliya ee Mareykanka maalgeliyo waxaana qandaraaska siisey Wasaaradda Gaashaandhiga Ameerika.
Siyaasadda
Bishii October, 2021, qaar kamid ah ciidamadda Danab ayaa lagu amray in ay qeyb ka noqdaan howlgal dowladda ku qaadey ciidamadda Ahlu Sunna Waljameeca halkaasoo ay ku dhinteen laba askar kumaandoos ah.
"Hase ahaatee, inta badan ciidamadda Danab ayaa go'aankaas ka hor-yimid amarkaas siyaasadeysanaa waxaana taas badalkeeda ay qaadeen howlgalo ka dhan ah ururka Al-Shabaab," ayuu yiri Beeryare.
Talaabadaas ayaa sababtay in dowladda Mareykanka ay joojiso taageerida ciidamaddan muddo afar bilood ah. Go'aankaas waxaa ka dhashay hakad ku yimid dhismaha isbitaal iyo goobo tababar oo laga hirgelin lahaa Balidoogle.
GAROWE ONLINE
