Qaraxyo ruxay Sri Lanka, khasaaraha iyo wararkii ugu dambeeyay

COLOMBO, Sri Lanka – Ku dhowaad 200 ruux ayaa ku geeriyootay kadib sideed qarax oo ka dhacay maanta wadanka Koonfurta Aasiya ku yaalla.

Weerarada oo lala beegsaday Huteelo iyo Kaniisado ayaa lagu soo beegay xili dadka Masiixiga u dabaaldegayeen ciidoodda Axadda.

Madaxda dalkaasi sida madaxwaynaha iyo ra'iisul wasaaraha ayaa si adag u cambaareeyay dhacdadaan oo aysan wali jirin koox illaa iyo haatan dusha saaratay.

Sidoo kale qaar kamida hogaamiyeyaasha qaramadda gobolka iyo dunida inteeda kale ayaa si lamida tacsi u diray ehelada dadkaasi la xasuuqay.

Wararka ayaa intaasi ku daraya in 20 kamida dadka geeriyooday ay Ajaaniib yihiin xili la filayo in tirada ay sii kordhi karto.

Goobaha waxbarashada ayaa la xiray muddo laba maalmood ah, iyada oo wadankaasi looga dhawaaqay maalmo baroor-diiq ah.

Shacabka ayaa isugu soo baxay Isbitaalada si ay dhiig ugu deeqaan in ka badan 500 ruux oo dhaawacyo kala duwan ay soo gaareen.

Dalka Sri Lanka oo dadkiisa lagu qiyaaso in ka badan 21 milyan oo ruux ayaa waxaa kaliya Muslimiin ka ah 9.7% taasi oo ah tiro aad u badan.

GAROWE ONLINE