Puntland: Dardargelinta coddeynta Aqalka Hoose oo laga shiray

Madaxwayne Deni iyo guddiga doorashada heer federaal ayaa ku kulmay Garowe.

GAROWE, Puntland - Madaxweynaha Puntland, Siciid Cabdullaahi Deni, ayaa maanta Qasriga Madaxtooyada ee Garoowe ku qaabilay xubno ka socda Guddiga Doorashooyinka ee Heer Federaal.

Wafdiga oo kasoo kicitay magaalada caasimadda u ah Soomaaliya ee Muqdisho ayaa waxaa hoggaaminayay guddoomiyaha guddigaas, Maxamed Xasan Ciro .

Guddiga ayaa ugu horeyn Madaxweynaha iyo guud ahaan Puntland ugu hambalyeeyay qabashada doorashadii goleyaasha deegaanka hal qof iyo hal cod ee ka dhacday Ufeyn , Qardho iyo Eyl.

"Kulanka ayaa looga hadlay arrimaha Doorashada Soomaaliya , gaar ahaan sidii loo dardagelin lahaa Doorashada xildhibaanada Golaha Shacabka," ayay madaxtooyaddu ku tiri war qoraal ah.

Qoraalka ayaa la raaciyey: "Waxaa kulanka ka qeybgalay Guddiga Doorashooyinka ee heer Federaal (FEIT), Guddiga Doorashadda ee heer Puntland (SEIT) iyo Saraakiil Madaxtooyo".

Dhanka kale, sarkaal u hadlay guddiga ayaa u sheegay Garowe Online in ay madaxwayne Deni u caddeeyay in Puntland u diyaarsan tahay coddeynta ayna bilaabeyso dhowaan.

Doorashadda Aqalka Hoose ayaan wali caddeyn goorta ay bilaabaneyso. Hase ahaatee, waxaa qaar kamid ah maamuladda iyo magaala madaxda Muqdisho ka soconaya qabanqaabo ballaaran.

GAROWE ONLINE