Al Shabaab oo beenisay inuu katirsanyahay ninka ay qabatay NISA
-
- Posted On 28-12-2016, 10:48AM
GAROWE, Puntland- Xarakada Al Shabaab, ayaa ka hadashay nin shalay boggeed Twitterk kusoo bandhigtay hay'adda Nabad Sugidda iyo Sirdoonka Qaranka Somalia, kaasoo la sheegay inuu ka dambeeyay weerarkii 16 maalmood ka hor lagu qaaday dekedda magaalada Muqdishu caasumadda Somalia.
Shabaab oo barteeda Internetka ku baahisay cod iyo qoraal ay uga hadlayso weerarkaas ayaa sheegtay inuusan ahayn ninka hay'addaasi qabtay ruuxii waday baabuurka qaraxa lagasoo buuxiyay ee lagu weeraray xaruntaas oo ay hor dhoobnaayeen dad shacab ah.
Kooxdan ayaa ruuxa qaraxa fuliyay waxaa cadeeyeen inuu ku geeriyooday weerarkaas, iyagoo sidoo kale baahiyay waraysi ay ka qaaday Idaacadooda kahor intuusan howlgalkaasi dhicin.
Magaciisa ayay ku sheegeen inuu yahay Khaalid Xuseen Maxamed oo loo yaqaanay "Garaad" oo sida ay xuseen kasoo kicitimay dhinaca Puntland, halka hay'adda NISA ninka ay qabatay magaciisa ku sheegtay Maxamed Ibrahim Xasan.
NISA, ayaa xustay in Ibrahim uu gaariga kasoo kaxeeyay deegaanka Jannaale oo ay gacanta ku hayso Al Shabaab.
Balse, arrintas Shabaab wax faaf faahin kama aysan bixin.
Majirto cid si madax bannaan u xaqiijin karta wararka iska hor imaanaya ee kasoo baxay labada dhinac.
Weerarkaas oo la fuliyay xilli aroor ah, ayaa waxaa ku geeriyooday in kabadan 20 qof, waxaana DFS goor sii horraysay sheegtay inay baaritaan kuwadaa sida wax u dhaceen iyadoo markii dambe ay baahiysay in gacanta lagu hayo qofkaas oo ka dagay gaariga kahor intuusan qarxin.
GAROWEONLINE
