Axmed Madoobe oo lagala hadlay dardargelinta doorashada

MUQDISHO, Soomaaliya - Madaxweynaha Dowlada Jubaland, Axmed Maxamed Islaam, ayaa xarunta Madaxtooyada ku qaabilay wafdi ka socday wakiiladda Beesha Caalamka ee fadhigoodu yahay Muqdisho.

Wafdigaan ayaa waxaa hogaaminayay Wakiilka gaarka ah ee Xoghaya guud ee Qaramada midoobay u qaabilsan arimaha Soomaaliya James Swan ahna diblumaasi sare oo u dhashay dalka Mareykanka.

Waxaa kale oo wafdi kamid ahaa Wakiilka Gaarka ah ee Guddoomiyaha Guddiga Midowga Afrika u fadhiya Soomaaliya, Francisco Caetano Madeira, xubno kasocday Midowga Yurub iyo urur goboleedka IGAD.

War-saxaaafadeed kasoo baxay Madaxtooyada dowladda Jubaland ayaa lagu fahfaahiyey qodobadda kasoo baxay kulankan iyo guud ahaan ajendaha ay dhinacyadda isla falanqeeyeen.

"Kulanka ayaa lagaga hadlay xaalada dalka iyo arimaha Doorashooyinka, iyadoo masuuliyiinta ka socday beesha caalamka ay uga mahad celiyeen Madaxweyne Axmed Maxamed Islaam sida ay uga go’antahay in doorashada dalku ay ku dhacdo hanaan wadar ogol ah isla markana la dardar galiyo shaqooyinka muhiimka u ah in dalka ay sida ugu dhow uga dhacdo doorasho loo dhan yahay," ayaa lagu yiri bayaankan nuqul kamid ah uu arkay xafiiska wararka ee Garowe Online.

Bayaanka ayaa lagu soo xiray: "Waxaa la isku raacay in la joogteeyo kulamada iyo wadatashiyada la xiriira arimaha Doorashooyinka iyadoo sidoo kale la isla qiray in dalka ay muhiimad weyn u leedahay in la dadajiyo howlaha Doorashooyinka".

Socdaalka ay diblumaasiyiinta ku tageen Kismaayo ayaa qeyb ka ah safaro ay ku tagayaan xarumaha maamuladda uguna kuur-galayaan siyaasada iyo fulinta heshiiska doorashooyinka ee la gaarey May, 2021-ka.

GAROWE ONLINE