Beesha Caalamka oo si wadajir ah u naqdisay muddo kordhinta

MUQDISHO, Soomaaliya - Wakiilada Beesha Caalamka oo si wadajir ah walaac uga muujiyey qaraarka lagu kordhiyey muddo xileedka maamulka Farmaajo ayaa ku sifeeyay mid xasilooni daro iyo nabad-geylo xumo u horseedaya waddanka.

Hogaamiyeyaasha Soomaalida ayay cod dheer ugu booriyeen in ay dib ugu laabtaan wadahadalada xalka loogu raadinayo khilaafka doorashooyinka, kuna gaaraan is-afgarad ku saleysan heshiiska 17-kii September.

"Waxaan ugu baaqeynaa dhammaan dhinacyada inay is xakameeyaan, sii wadaan wadahadalka, iskana ilaaliyaan ficillada hal dhinac oo kicin kara xiisadaha," ayaa la raaciyey qoraalka Beesha Caalamka.

Diblumaasiyiinta ayaa balanqaadey in ay taageerayaan dedaalo kasta oo lagu fulinayo heshiiska 17-kii September kaasoo xeerinaya in doorashadu noqoto mid dadban kana dhaceysa laba degaan doorasho dhamaan maamuladda waddanka.

"Howlgalka Midowga Afrika ee Soomaaliya (AMISOM), Kanada, Danmark, Midowga Yurub (EU), Finland, Jarmalka, Urur-Goboleedka IGAD, Ireland, Italy, Netherlands, Norway, Spain, Sweden, Switzerland, United Kingdom, United Dowladaha, iyo Qaramada Midoobay waxay si aad ah uga walaacsan yihiin in 12-ka Abriil la horgeeyay Golaha Shacabka qaraar lagu beddelayo heshiiskii 17-kii Sebtember loona rogay hannaan doorasho oo ka dhalan doona muddo-kordhin dheer oo loo sameeyo Madaxweynaha iyo Baarlamaanka," ayaa lagu bilaabay bayaanka.

War-saxaafadeedka ayaa la raaciyey: "Waxaan si is-daba joog ah u sheegnay in geeddi-socod siyaasadeed oo is barbar socda, doorashooyin hal dhinac ah ah, ama dadaallada cusub ee keenaya kordhinta muddooyinka hore aan la taageeri doonin".

"Qaraarkii 12-kii Abriil wuxuu wiiqayaa nabadda, amniga, iyo xasilloonida Soomaaliya iyo meelo ka baxsan. Qaraarkan ayaa sidoo kale sii daahin doona qabashada doorashooyinka lagu kalsoonaan karo ee ay sugayaan dadka Soomaaliyeed," ayay ku dareen.

Saaxiibadda ayaa tibaaxay: "Waxaan ku qanacsanahay in hirgalinta heshiiskii 17 Sebtember ay tahay tan ugu wanaagsan ee waxqabad ee la heli karo sidaa darteed waxaan ku boorineynaa Dowladda Federaalka iyo hoggaamiyeyaasha Dowlad Goboleedyada Xubnaha ka ah Federaalka in ay si deg deg ah ugu soo laabtaan wadahadallada si loogu heshiiyo habka loo marayo. Waxaan ugu baaqeynaa dhammaan dhinacyada inay is xakameeyaan, sii wadaan wadahadalka, kana fogaadaan ficillada keli ah ee hurinaya xiisadaha".

"Waxaan diyaar u nahay inaan siino xafiisyadda taageero si loo fududeeyo loona soo nooleeyo wadahadal loo dhan yahay oo ku saleysan heshiiskii 17 Sebtember," ayaa lagu soo gabagabeeyay warka qoraalka ah oo uu arkay bogga Garowe Online.

GAROWE ONLINE