Hay’adda Cunnada Aduunka: 4.3 Milyan oo Soomaali ah ayaa wajahi doona sanadkan “Gaajo Daran”
-
GAROWE ONLINE XAFIISKA MUQDISHO
- Posted On 14-11-2023, 07:06PM
WASHINGTON (GO) - Afar meelood meel ka mid ah dadka Soomaaliyeed ayaa la filayaa in ay wajahaan “Gaajo daran” sanadkan sababo la xiriira abaaro iyo daadad ay sababeen isbeddelka cimilada, sida ay Talaadadii sheegtay Hay’adda Cunnada Adduunka.
Qaramada Midoobay ayaa ku tilmaantay fatahaadda ka dhacay Soomaaliya iyo dalalka dariska la ah ee Bariga Afrika ee ku barakaceen boqolaalka kun dhacdo qarni kasta hal mar dhacda.
"4.3 milyan oo qof (rubuc ka mid ah dadka) ayaa la filayaa in ay wajahaan gaajo ba’an dhammaadka sannadkan," ayuu yiri Pietroc Wilton, afhayeenka Barnaamijka Cunnada Adduunka ee Soomaaliya.
"Abaarta iyo fatahaadaha ayaa sii dheereyn doona dhibaatada gaajada ee ka jirta Soomaaliya," ayuu raaciyay.
Xafiiska Qaramada Midoobay ee isku xirka arrimaha bini’aadantinimada ayaa sheegay in daadadka ka dhashay roobab xooggan oo billowday horraantii bishii Oktoobar ay dileen ugu yaraan 32 qof, halka ay in ka badan 456,800 oo qofna ay ku barakaceen.
GAROWE ONLINE
