Jubaland oo aqoonsatay shirka uu ku dhawaaqay Rooble

KISMAAYO, Jubaland – Maamul goboleedka Jubaland ayaa ku dhawaaqay in uu ka qeybgalayo shirka uu iclaamiyey Ra'iisul Wasaaraha xukuumadda xilgaarsiinta Maxamed Xuseen Rooble kaasoo qorshuhu yahay in uu dhaco 20-ka bishaan Maajo sanadkan aan ku jirno 2021-ka.

Maxamuud Sayid Aadan, madaxwayne ku xigeenka koowaad ee Jubaland oo u waramay laanta afka Soomaaliga ee BBC-da, ayaa daaha ka rogay in uusan wax iska bedeli doonin ciidamada gaarka ah uu Axmed Madoobe iska soo horumarin jiray kahor safarka Muqdisho.

"Taasi haddii ay amni darro ama nabad jirtaba way dhaceysaa maxaa yeelay waa ciidanka ilaaladda gaarka ah ee madaxda," ayuu ku daray markii su’aal arrintaas la xiririta la waydiiyey.

Mr Aadan oo ku adkeystay in doodahooda ay kusoo bandhigi doonan miiska wadahadaladda ayaa hoosta ka xariiqay in ay ku rajo weyn yihiin in shirka soo aadan lagu xaliyo arrimaha ugu waaweyn ee khilaafka ka taagan yahay sidda ciidanka Farmaajo geeyay Gedo.

Sida laga soo xigtay Aadan, ra'iisul wasaare Rooble maadaama uu la wareegay qorshaha guud ee ammaanka guud ee qaranka waa in uu bixiyaa amarka lagu soo saarayo ciidamadaas uu maamulka waqtiga ka dhacay ee Farmaajo ku daabulay gobolka Gedo.

"Markii hadii ay shaqeyn weyday nin-tooxsiga, shirqooladii siyaasadeed iyo in laga sii shaqeeyo natiijadda kasoo baxeysa doorashadda, waxaan rajeynaynaa in shirka uu guuleysto," ayuu ku daray Axmed, isagoo soojeediyey in danta shaqsiga laga horumariyo dan guud.

Kadib markii Aqalka Hoose ee baarlamaanka federaalka Soomaaliya uu laalay sharciga muddo kororsiga loogu sameeyay taliska Farmaajo dibna loogu laabtey heshiiska 17-kii September, xukuumada xilgaarsiinta ayaa la wareegtay geedi-socodka maamulka iyo ammaanka doorashadda.

GAROWE ONLINE