Madaweynaha oo sheegay xilliga Soomaaliya laga qaadi doono Cunaqabateynta Hubka
-
GAROWE ONLINE XAFIISKA MUQDISHO
- Posted On 25-11-2023, 05:21PM
MUQDISHO, Soomaaliya - Madaxweynaha Jamhuuriyadda Federaalka Soomaaliya Xasan Sheekh Maxamuud oo furay kalfadhiga 4-aad ee Baarlamaanka Federaalka Soomaaliya ayaa soo bandhigay hiigsiyada qaran ee ay dadaalka ku bixisay dowladdu.
hiigsiyadaas ayaa ka mid ah cafinta deynta lagu leeyahay Soomaaliya, qaadista cunaqabateynta hubka, aqbalaadda codsiga Soomaaliya ee ka mid noqoshada urur goboleedka dhaqaalaha Bulshada Bariga Afrika iyo xoreynta deegannada gacanta ugu jira ‘AS’.
Madaxweynaha ayaa sheegay in sannadkan gudihiisa laga guul gaarayo arrimaha la xiriira dibadda iyo beesha caalamka, isaga oo sheegay:
"Asbuuca ugu horreeya bisha December Cunaqabateynta Hubka ayaa nalaga qaadaa, 13 December sidoo kale deynta ayaa nalaga cafinaa, guulo waaweyn ayaa soo socda".
Madaxweynaha ayaa sidoo kale tilmaamay sida ay uga go’an tahay in kor loo qaado nolasha dadka Soomaaliyeed, cirib-tirka saboolnimada iyo daminta colaadaha sokeeye.
GAROWE ONLINE
