Madaxweynaha oo gudoomiyay Shirka Golaha Wasiiradda

MUQDISHO, Soomaaliya - Golaha Wasiirada ee Xukuumada Federaalka Soomaaliya ayaa maanta yeeshay kulan degdeg ah oo looga hadlay dhibaatada ka dhalatay roobabkii duufaanada watay ee ka da’ay deegaano badan oo ka tirsan dalka.

Kulanka ayaa waxaa shir guddoominayay Madaxweynaha Jamhuuriyadda Federaalka Soomaaliya Xasan Sheekh Maxamuud waxaana ka qeyb qaatay mas'uuliin ka tirsan gobolka Banaadir.

Madaxweynaha ayaa intii uu kulanka socday kula dar daarmay xubnaha Guddiga Qaran ee Gurmadka Fatahaadaha in ay sii laba jibaaraan dadaalkooda, waxaana uu uga digay dadka in ay ka fogaadaan meelaha halista ah sida marin biyoodyada.

Dhankiisa Guddoomiyaha Gobolka Banaadir ahna Duqa Muqdisho Yuusuf Xuseen Jimcaale ayaa Golaha uga warbixiyay saameynta roobabka ka da’ay Gobolka Benaadir iyo dadaallada ay sameeyeen Maamulka Gobolka.

Dalka waxaa ka jira fatahaado baahsan oo saameeyay dad badan oo ku noolaa gobollada koonfureed, gaar ahaan Shabeellaha Dhexe, Hiiraan iyo Gedo.

GAROWE ONLINE