Mareykanka oo qaadacay ku darsiga maamulka Farmaajo

WASHINGTON, USA – Guddiga xiriirka dibadda Aqalka Sare ee waddanka Mareykanka ayaa si adag wuxuu uga hor-yimid muddo kordhinta lagu muransan yahay ee Golaha Shacabka u sameeyay maamulka Farmaajo.

Qoraal lagu daabacay barta Twitter-ka ee guddigan ayaa lagu caddeeyay in ay talaabadan ay curyaamineyso geedi socodka lagu goobayo in coddeynta soo aadan ay noqoto mid lagu kalsoonaan karo.

Bayaanka oo looag falceliyey qoraal majaladda AP ka diyaarisay muddo kordhinta ayaa hoosta looga xariiqay in go’aanka halka dhinac ee Aqalka Hoose ay xasilooni darro u horseedeyso dalkan dhaca Geeska Afrika.

Hogaamiyeyaasha ayaa loogu baaqay in ay dib ugu laabtaan wadahadaladda isla markaana ay joojiyaan carqaladeynta wadaxaajoodka.

"Doorashooyin waqtigooda ku dhaca waa tiir muhiim u ah badqaka dimuqraadiyadda. Isku-dabaridka muddo kordhin waa jebinta caadooyinka dimuqraadiyadda waxaana ay xasilooni darro u horseedeysaa Soomaaliya. Daneeyeyaasha waa waajib in ay gaaraan heshiis. Isku-dayada lagu carqaladeynayo wadahadaladda dhabaha doorashooyin lagu kalsoonaan karo waa in la joojiyaa," ayuu lagu yiri warka qoraalka ee guddiga.

Shalay ayay ahayd markii Golaha Shacabka uu ku dhawaaqay in uu muddo kordhin laba sano ah u sameeyay maamulka Farmaajo.

Muddo kordhintaas ayaa la macno ah in meesha uu ka baxayo heshiiska doorasho ee la gaarey 17-kii September, 2020 iyo in ay soo xirmayaan dhamaan albaabadii wadaxaajoodyadda ee xalka loogu goobayey khilaafka.

GAROWE ONLINE