Muwaadiniinta Sacuudiga oo laga mamnuucay Soomaaliya
-
WARIYAHA MUQDISHO GAROWE ONLINE
- Posted On 17-05-2021, 05:33AM
RIYADH, Sacuudi Carabiya - Boqortooyadda Sacuudi Carabiya ayaa muwaadiniinteeda waxay ka mamnuucdey in ay u socdaalaan 13 waddan oo ay kamid tahay Soomaaliya.
Dalalkaas ayaa waxay kala yihiin; Libya, Syria, Lebanon, Yemen, Iran, Turkey, Armenia, Soomaaliya, Democratic Republic of Congo, Afghanistan, Belarus, iyo India.
Wasaaradda arrimaha gudaha Sacuudiga oo war-saxaafadeed soo saartey ayaa daaha ka rogtay in go'aankan cusub uu la xiriiro khatarta safmareenka fayruska Corona.
"Muwaadiniinta Sacuudi Carabiya ogolaanshiyo la'aan kuma tagaan dalalkaas duulimaadyo toos ah iyo kuwa aan toos ahayn," ayaa lagu yiri qoraalka oo lala wadaagay saxaafada.
Bishii Febraayo, Sacuudiga ayaa wuxuu joojiyey dadka uga imaanaya 20 waddan oo Soomaaliya ku jirto sababo ku aadan Covid-19; go'aankan waa mid la cusbooneysiiyey.
Dhanka kale, xukuumadda Riyadh ayaa waxay qaadey amarkii ahaa in la karantili doono todoba illaa 14 maalmood dadka ka imaanaya 20 dal oo uu kamid yahay Mareykanka.
Inkasta oo aysan shaacin liiska oo idil walina xayiraadii ay saaran tahay, haddana magacyada soo muuqdey waxaa kamid ah India, Britain, Germany, France iyo Imaaraadka Carabta.
Sida laga soo xigtay qoraalka wasaaradda, dadka ka imaanaya dalalkaas waxaa waajib ah in ay si dhameystiran u qaataan talaalka fayruska ayna qataan shahaadada muujineysa.
GAROWE ONLINE
