Soomaaliya oo la filayo in maanta laga qaado cunaqabateynta hubka 32 sano kadib!

15-ka xubnood ee golahan ayaa laga sugayaa in ay u codeyaan qaraarkan.

MUQDISHO, Soomaaliya - Golaha Ammaanka ee Qaramada Midoobay ayaa maanta u codeynaya in la qaado cunaqabateynta hubka ee saaran dowladda Soomaaliya iyo ciidamada ammaanka, in ka badan 30 sano kaddib cunaqabateynta hubka ee dalka lagu soo rogay.

15-ka xubnood ee golahan ayaa laga sugayaa maanta oo Jimce ah in ay ansixiyaan labo qaraar oo ay soo diyaarisay dowladda Ingiriiska oo kala ah in Soomaaliya laga qaado cunaqabateynta hubka iyo in cunaqabateyn lagu soo rogo kooxda Al-Shabaab.

Dowladda Soomaaliya ayaa muddo dheer codsatay in laga qaado cunaqabateynta hubka si ay u xoojiso ciidamadeeda dagaalka kula jira ‘AS’.

Madaxweyne Xasan Sheekh Maxamuud ayaa todobaadkii hore sheegay in bilowga bisha December Soomaaliya laga qaadi doono cunaqabateynta hubka, xilli uu la hadlayay labada gole ee Baarlamaanka.

GAROWE ONLINE