Xasan Sheekh oo shaaciyey "awood cusub ay Soomaaliya helayso"

Shirka Amniga Soomaaliya ee ka dhacay magaalada New York ayuu kusoo hadal-qaadey qaddiyadan.

MUQDISHO, Soomaaliya - Madaxweyne Xasan Sheekh Maxamuud ayaa Xarunta Qaramada Midoobey ee magaalada New York waxa uu ku guddoomiyey Shirka Amniga Soomaaliya.

Shirkan oo ay Soomaaliya soo qaban qaabisay ayna ka qeyb-galayaan 26 dal, Qaramada Midoobey, Jaamacadda Carabta, Midowga Yurub iyo kan Afrika ayaa ahaa qaaraan-uruurin.

Xasan Sheekh ayaa khudbadiisa diiradda ku saarey dib u dhiska ciidamada, xoreynta deegaannada ku jira gacanta Al-Shabaab, muhiimadda iskaashiga amniga ee heer qaraadadeed iyo heer caalam, bixitaanka ciidamada ATMIS iyo xasilinta siyaasadeed ee Soomaaliya.

"Dhimista tirada ciidamada ATMIS ee Soomaaliya oo haatan socota waxay caddeyn u tahay horumarka aan ka sameynay qorshaha xaqiijinta Soomaaliya xasilloon oo leh hay'ado amni oo si buuxda ula wareega mas'uuliyadda sugidda amniga dalka," ayuu yiri.

Dalalka ka tirsan Golaha Ammaanka ee Qaramada Midoobay ee taageeray in cunaqabateynta hubka laga qaado Soomaaliya, haatanna ku garab taagan cafinta deynta iyo dhismaha Ciidamada Qalabka Sida ayuu u mahadnaqay.

"Waxaan soo dhaweynayaa go’aankii taariikhiga ahaa ee Golaha Ammaanka ee Qaramada Midoobay uu cunaqabateynta hubka kaga qaaday Soomaaliya," ayuu xusay.

Wuxuu intaas ku daray: "Tani waa guul muhiim ah oo u soo hoyatay Soomaaliya, waxayna muujinaysaa horumarka la taaban karo ee ku yimid hannaanka maamulka hubka iyo rasaasta ciidamada, iyadoo go’aankani uu awood noo siinayo in aan si buuxda u qalabeyno ciidamada Qaranka Soomaaliya".

Soomaaliya ayaa waxaa xayiraadan ay saarneyd tan iyo 1992-dii waxaana ay keentay in ay curyaamaan dagaalada lagu ciribtirayo Al-Shabaab taasoo dedejisay ololaha qaaditaanka cunaqabateynta.

GAROWE ONLINE