Xubno Al-Shabaab ah oo "ku dhintay" qarax ay maleegayeen

MUQDISHO, Soomaaliya - Al-Shabaab ayaa 61 dagaalame oo ay ku jiraan lix hogaamiyeyaal waxay ku weyday qarax ka dhacay xarun lagu diyaarinayey qaraxyada, sida ay warisay warbaahinta dowlada.

Idaacada ku hadasha afka ciidamada Soomaaliya oo baahisay in qaraxa uu dhacay shalay galab ayaa xustey in ay ku taalo tuulada Aala-fuutow oo 65-KM u jira degmada Qoryooleey ee gobolka Shabeelaha hoose.

"Goobtaasi inuu qarax ka dhaco waxaa sababay kadib markii waxyaabihii ay farsameeynayeen ay ku qarxeen xarunta [oo] ahayd guri ka koobnaa 11-qol kaasi oo lagu diyaarinayay gaari iyo miinooyinka dhulka lagu aaso iyo sidookale jaakadaha maleeshiyaadka argagixisada u isticmaalaan isqarxinta," ayaa lagu yiri warbixinta Idaacadda SNA.

Sida ku cad warbixinta, hogaamiyeyaasha waxaa kamida ajaaniib - Axmed Shariif (Abuu Bilaal) oo u dhashay Agaanistaan iyo Khaalid oo la sheegay in uu u dhashay Kenya -  iyadoo labaduba qaabilsanaayeen qaraxyada.

Saraakiil ka tirsan taliska milatariga Soomaaliya oo warbixinta lagu soo xigtey iyaddoo aan lasoo bandhigin magacyadooda ayaa waxay intaas ku dareen in ay baaritaan ku waddaan magacyada hogaamiyeyaasha kale.

Marka laga soo tago sheegashada ciidamada Soomaaliya, ma jiraan illo wareedyo madax-banaan oo xaqiijinaya. Sidoo kale, ma jiro war ku saabsan dhacdadan oo kasoo baxay dhanka ururka xiriirka la leh Al-Qaacida.

Inta badan Al-Shabaab ayaa dardargelisa weerarada ay ka fuliso magaalooyinka Soomaaliya marka ay soo dhowaadaan doorashooyinka madaxtonimada iyo baarlamaanka oo dhowaan bilaaban doonta.

GAROWE ONLINE