Maxay Tahay Sababta Israa’iil iyo Iiraan uga Baqayaan Dagaal Toos ah?

Dadka taagan haraaga gantaal ku dhacay agagaarka Badda, Israa’iil, bishii Oktoobar. Erik Marmor/Getty Images

(GO)-  Ku dhawaad hal bil ayaa ka soo wareegtay tan iyo markii Israa’iil ay dirtay in ka badan 100 diyaaradood iyo drones si ay u beegsadaan saldhigyada milateri ee Iiraan, iyadoo caalamka uu wali sugayo jawaabta Tehran.

Weerarkii Israa’iil ayaa yimid saddex toddobaad ka dib markii Iiraan ay ku ridday in ka badan 180 gantaallo ballistic ah — kuwaas oo intooda badan la sheegey in la fashiliyay — bishii Oktoobar 1-dii, si ay uga aargudato dilkii labada hoggaamiye ee sare ee Hamas iyo Hezbollah.

Dagaalka dhabta ah ayaa soo bilowday bishii Abriil, markii Iiraan ay si toos ah u weerartay Israa’iil iyadoo adeegsanaysa ugu yaraan 300 gantaallo iyo drones, si ay uga aargudato weerar lagu qaaday mid ka mid ah xarumaheeda diblomaasiyadeed. Xilligaas, Israa’iil ayaa sugaysay maalmo badan ka hor inta aysan qaadin weerar jawaab celin ah.

Xeeldheerayaal ayaa aaminsan in weerarrada tooska ah ee labada dhinac aysan horseedin dagaal ballaaran oo degdeg ah sababtoo ah wadaxaajoodyo qarsoodi ah oo ay garwadeen ka yihiin dalal ay ka mid yihiin Mareykanka, Sacuudiga, Qadar iyo Imaaraadka Carabta.

Julien Barnes-Dacey, agaasimaha Bariga Dhexe ee Golaha Yurub ee Xiriirka Caalamiga ah, ayaa sheegay in labada dhinac ay og yihiin khatarta dagaal guud oo gobolka gilgila. Si kastaba, ayuu yiri, “Tallaabadan waxay u muuqataa mid aan waari karin oo khatarteedu aad u sarreyso.”

Ra’iisul Wasaaraha Israa’iil, Benjamin Netanyahu, ayaa isbuucii hore muuqaal farriin ah ku sheegay in Israa’iil ay kordhin karto weerarrada haddii Tehran ay sii waddo dagaalka. “Israa’iil maalinkasta way xoogaysanaysaa,” ayuu yiri Netanyahu. “Caalamku wuxuu arkay oo kaliya xoogaa yar oo awooddeena ka mid ah.”

Hub Caqli-gal ah oo Xoogga Lagu Muujiyo

Xeeldheerayaasha militariga ayaa tilmaamaya in weerarrada labada dhinac u egyihiin dagaalka nooca “shock and awe,” oo ah adeegsiga awood milatari oo baaxad leh si loo burburiyo awoodda cadowga. Taa beddelkeeda, weerarradan waxay diiradda saarayaan bartilmaameedyo milatari oo gaar ah.

Farzan Sabet, oo ah falanqeeye ka tirsan Machadka Daraasaadka Geneva, ayaa sheegay in “weerarrada saxda ah” ay yihiin qaab dagaal oo cusub oo ay labada dhinac isku dayayaan inay ku xakameeyaan colaadda.

Khatar Cusub: Beegsiga Kaabayaasha Tamarta

Xeeldheerayaal ayaa ka digaya in Iiraan ay qorsheyneyso inay beegsato kaabayaasha tamarta ee Israa’iil haddii Iiraan ay la kulanto weerarro culus oo ka dhan ah kaabayaasha muhiimka ah ee dalkaas.

Iyadoo xiisadda ay weli kor u sii kacayso, waxay khubarada qaar shaki gelinayaa in dagaalka la xakameyn karo. Qorshe kasta oo ay labada dhinac wataan, waxay u muuqataa in colaadda gobolka ay tahay mid weli qarka u saaran inay qaraxdo.

GAROWE ONLINE