Al-Shabaab oo weeraro mataano ah ka fulisay waqooyi bari Kenya

NAIROB, Kenya – Dagaalameyaal looga shakisan yahay Al-Shabaab ayaa degaanka Khorof Kharar ee ismaamulka Wajeer ku burburiyey Anteeno ay lahayd shirkadda isgaarsiinta ee Safaricom, sidda ay sheegtay saxaafada.

Thomas Ngeywa, taliyaha booliska maamulka Wajeer, ayaa tilmaamay in maleeyshiyaadka ay ku guuldareysteen in ay weerareen saldhig bileys.

Dhacdooyinkan isku-xig-xigay ayaa lasoo wariyey abeere labadii subaxnimo ee Sabtida maanta ah. Illaa iyo haatan, lama soo sheegin dhimasho.

Khorof Kharar ayaa qiyaastii 20 KM u jirta Qarsa, fariisinka ugu weyn ee xoogaga gacansaarka la leh Al-Qaacida ku dhex-leeyihiin gudaha Wajeer.

Dhanka kale, Al-Shabaab oo war kasoo saartay howlgaladan ayaa ka sheegatay guulo, wallow aysan soo bandhigin caddeymo xoojiya sheegashadeeda.

Weeraradan ayaa kusoo aadaya maalmo kadib markii saraakiil sirdoon ay wariyeen in xubno Al-Shabaab ah oo ka yimid Soomaaliya ay soo galeen Kenya si ay u fuliyaan weeraro inta laguda jiro bisha Ramadaan.

Waa markii labaad oo bil gudaheeda ah oo laamaha ammaanka Kenya ay iska caabiyaan weeraro uga yimaada dagaalameyaashan hubeysan.

Bishii hore, cidamadda ayaa kooxda kula dagaalamay Qaqabey. Lix shacab ah iyo afar maleeyshiyaadka ah ayaa ku nafwaayey isku dhacaas.

Ismaamulada dhaca waqooyi-barri Kenya ayaa muddooyinkii dambe la daalaadhacayey iska caabinta weeraro kaga yimaada Al-Shabaab oo sii kordhayey. Wajeer, Garissa iyo Mandera ayaa xuduud la wadaaga Soomaaliya.

GAROWE ONLINE