Askari Kenyan ah oo lagu tiriyay inuu dhintay oo qoyskiisa la xiriiray 9 sano kadib

Image

NAIROBI, Kenya - Qoys ku nool Eldoret, ayaa farxad iyo nafis dareemay kadib markii ay ogaadeen in xubin qoyska ka tirsan, oo ah askari ka tirsan Ciidanka Difaaca Kenya (KDF) Abdullahi Issa Ibrahim, oo la aaminsanaa inuu dhintay sagaal sano ka hor, uu weli nool yahay.

Abdullahi wuxuu caan baxay kadib markii muuqaal si weyn loogu faafiyay baraha bulshada lagu arkay isaga oo dalbanaya in dowladda Kenya ay ka caawiso inuu dib ugu soo laabto gurigiisa.

Ninkaan, oo ku labisan dharka ciidanka KDF, ayaa muuqaalka ku sheegay inuu sagaal sano ku xirnaa gacanta kooxda Al-Shabaab ee Soomaaliya.

“Waxaan ahay askari Kenyan ah. Waxaan ku biiray ciidanka 1986. Al-Shabaab ayaa i qabsaday 15-kii Janaayo 2016 intii lagu guda jiray weerarkii ay Al-Shabaab ku qaadeen xerada KDF ee El Adde,” ayuu yiri Ibrahim.

Qoyskiisa ayaa ka sheekeeyay xanuunka ay ku noolaayeen sannado badan iyaga oo u haystay in ehelkooda waqti dheer lumay uu dhintay.

Gabadhiisa, Kadra Abdullahi, ayaa u sheegtay Citizen TV inay bil ka hor ka heshay wicitaan ka yimid lambar ajnabi ah oo Soomaaliya ah ka hor intaan muuqaalka aabbaheed caan noqon. Kadra waxay sheegtay in qofka soo wacay uu isku soo bandhigay inuu yahay aabbaheed oo muddo dheer la la’aa, taas oo iyada ka yaabisay oo niyad-jab ku dhalisay iyadoo la daalaa-dhacaysay inay rumaysato arrintaas.

“Ma haynno caddeyn inuu isagu yahay. Waxaan weydiiyay inuu weydiiyo nimanka haysta inay sawir ama muuqaal naga soo gaarsiiyaan si aan u bilowno sidii aan wax uga qaban lahayn. Wuxuu markaa ii sheegay in ay aniga i soo gaarsiin doonaan warbaahintooda,” ayay tiri Kadra.

Warkaan ku saabsan xaaladda Ibrahim ayaa dib u soo nooleeyay xanuunadii qoyska. Gabadhiisa ayaa sheegtay inay horey ula qabsadeen dhimashadiisa kadib markii KDF ay u soo saartay shahaado muujinaysa inuu dhintay.

GAROWE ONLINE

Related Articles

Kenya oo fashilisay afduub laga soo qorsheeyay Soomaaliya

Abdi ayaa soo galay Kenya isagoo ka yimid El-Ade ee dalka Soomaaliya sida laga soo xigtay ilo amni.

  • Afrika

    19-02-2025

  • 12:29PM

Dad ku dumay god dahabka laga qodo galbeedka Mali

Boubacar Keita, oo ka tirsan ururka baareyaasha dahabka ee Kenieba, ayaa sidoo kale xaqiijiyay dhimashada ugu yaraan 48 qof.

  • Afrika

    16-02-2025

  • 03:16PM