Dagaal mar kale ka qarxay caasimada Suudaan ee Khartuum

Dagaallada tan iyo 15-kii Abriil dhexmaray ciidamada iska soo horjeeda ayaa lagu dilay ku dhawaad ​​3,000 oo qof.

KHARTUUM, Suudaan - Dagaal ba’an oo u dhaxeeya ciidamada Suudaan iyo xoogaga RSF ayaa mar kale ruxay caasimadda Khartoum, iyadoo cudurro iyo nafaqo darro ay halis gelisay tirada sii kordheysa ee barakacayaasha.

Wararka ka imaanaya Omdurman – magaalada mataanaha la ah Khartoum - ayaa sheegaya in dagaalku uu saacadihii hore ee Axadda ka bilowday dhanka waqooyi ee magaalada.

Duqeymo dhanka cirka ah ayaa laga bilaabay qeybo ka mid ah waqooyiga caasimadda, sidda wararku sheegayaan, waxaana la adeegsaday madaafiic culus oo dhanka bari ee magaalada ah.

Dagaallada tan iyo 15-kii Abriil dhexmaray ciidamada daacadda u ah taliyaha ciidamada Abdel Fattah al-Burhan iyo RSF ayaa lagu dilay ku dhawaad ​​3,000 oo qof.

2.2 milyan oo kale ayaa lagu qasbay inay ka qaxaan guryahoodii gudaha dalka iyadoo ku dhawaad ​​645,000 ay u carareen xudduudaha si ammaan ah, sida uu sheegay Ururka Caalamiga ah ee Socdaalka.

Ugu yaraan 25 milyan oo qof oo ku nool Suudaan ayaa u baahan gargaar bini'aadantinimo iyo ilaalin gaar ah, sida laga soo xigtey Qaramada Midoobay.

Tirada dhimashada ayaa la rumeysan yahay inay aad uga badan tahay inta la diiwaan geliyey, iyadoo Hay’adda Caafimaadka Adduunka ee WHO ay sheegtay in saddex-meelood labo meel xarumaha caafimaadka ay dayacan yihiin.

GAROWE ONLINE