Dagaalka Moyale oo sii xoogeysanaya, kumannaan qofna u qaxey dalka Kenya

MOYALE - In ka badan 14,000 oo qof oo Itoobiyaan ah ayaa ka qaxay dagaallo dhimasho sababay oo ka socda magaalada Moyale ee koonfurta Itoobiya, iyagoo magangalyo ka raadsaday dalka deriska la ah ee Kenya, sida ay Sabtidii sheegeen saraakiisha gargaarka bani’aadannimada.

Dagaalka ayaa u dhexeeya bulshooyinka Soomaalida iyo Oromada, waxaana xiisadda huriyay muran ka dhashay calanka dowlad-deegaanka Soomaalida oo laga taagay magaalada Moyale, oo ku taalla xadka Itoobiya iyo Kenya, isla markaana ay si wadajir ah u maamulaan dowlad-deegaannada Soomaalida iyo Oromia.

Saraakiisha gargaarku waxay sheegeen in in ka badan 12 qof ay ku dhinteen dagaallada, iyadoo laga cabsi qabo in khasaaruhu intaas ka bato maadaama uu dagaalku sii socdo.

Laanqeyrta Cas ee Kenya ayaa sheegtay in in ka badan 10,900 oo qof oo barakacay lagu dejiyay lix xero oo ku-meel-gaar ah oo ku yaalla Moyale, halka ku dhowaad 4,000 oo kale ay la joogaan eheladooda iyo qoysas martigeliyay.

Tiradan ayaa si weyn uga badan xogtii Jimcihii, markaas oo maamulka gobolka Marsabit uu sheegay in in ka badan 2,000 oo Itoobiyaan ah ay xadka u gudbeen kaddib markii dagaalku billowday Arbacadii.

Malik Adan, oo ah madaxa Laanqeyrta Cas ee Kenya u qaabilsan gobolka Upper Eastern, ayaa sheegay in dadka barakacay ay si degdeg ah ugu baahan yihiin cunto, biyo, agabka nadaafadda iyo musqulo dheeraad ah si looga hortago cudurrada shubanka.

Laanqeyrta Cas ayaa qeybisay teendhooyin, bustayaal, gogosha jiifka iyo agab kale oo muhiim ah, iyadoo sidoo kale gargaar nafaqo siinaysa carruurta iyo hooyooyinka nuujinaya. Si kastaba, saraakiisha gargaarku waxay ka digayaan in sahayda jirta aysan dabooli karin baahida sii kordheysa.

Dagaalka ayaa sidoo kale hakad geliyay ganacsiga xuduudaha isaga gudba, waxaana jira cabsi laga qabo in colaadda sii socota ay sababto barakac hor leh.

GAROWE ONLINE