Dalalka Afrika ee Marti-gelinaya Saldhigyada Mareykanka oo Wajahaya Khatarta Gantaallada Iran

JABUUTI – Khubarada amniga iyo dhaqaalaha ayaa ka digaya xaalad cakiran oo ku soo fool leh qaaradda Afrika, iyadoo colaadda u dhaxaysa Iiraan iyo xulafadeeda Mareykanka iyo Israel ay sii xoogeysaneyso, taasoo si toos ah u saameyneysa waddamada ku yaalla Geeska iyo Waqooyiga Afrika.

Saldhigyada Milateri iyo Khatarta Gantaallada

Warar dhowr ah ayaa tilmaamaya in saldhigyo militari oo ay leeyihiin quwadaha waaweyn, gaar ahaan Camp Lemonnier ee Jabuuti iyo saldhigyada kale ee bariga Afrika, ay hadda ku jiraan meel ay si fudud u gaari karaan gantaallada riddada dheer ee Iiraan.

Arrintan ayaa dhalisay walaac weyn oo ku saabsan nabadgelyada waddamada martigeliya ciidamada shisheeye, iyadoo la cabsi qabo in haddii dagaal uu qarxo, saldhigyadaas ay noqon karaan bartilmaameedyo toos ah, taasoo halis gelinaysa rayidka iyo xasilloonida gobolka.

Saameynta Dhaqaale iyo Sicir-bararka

Dhinaca kale, qiimaha shidaalka ayaa sare u kacay, taasoo cadaadis ku keentay waddamada Afrika oo u badan kuwa shidaalka dibadda ka keena. Qiimaha raashinka ayaa sidoo kale kor u kacay, maadaama kharashka dhoofinta iyo raridda maraakiibta uu kordhay.

Badweynta Hindiya iyo Badda Cas, oo ah halbowlaha ganacsiga adduunka, ayaa wajahaya khataro cusub. Weerarrada ka dhanka ah maraakiibta ganacsiga iyo hanjabaadaha ku aaddan marinka Bab al-Mandab ayaa khasbay in maraakiib badan ay beddeshaan waddooyin kale oo ka fog Geeska Afrika, taasoo dhabar-jab ku noqotay dakhliga dekedaha iyo ganacsiga badda ee waddamada gobolka.

Baahida Dublamaasiyadeed

Waddamada Afrika, gaar ahaan Soomaaliya iyo Jabuuti, waxay hadda ku dhex jiraan loolan caalami ah oo u baahan dublamaasiyad taxadar leh iyo feejignaan sare. Khubaradu waxay ku baaqayaan in waddamada martigeliya saldhigyada ay sameeyaan qorsheyaal ka hortag ah oo la jaanqaadaya xaaladaha amni ee isbedelaya.

GAROWE ONLINE