Kenya oo soo Gabagabeysay Tababarka Ciidamo loo Dirayo Howlgalka Cusub ee Soomaaliya

ISIOLO, Kenya — Dowladda Kenya ayaa soo gabagabeysay tababar adag oo loo fidinayay ciidamo loo diyaarinayo in loo daadgureeyo dalka deriska ah ee Soomaaliya, kuwaas oo ka qeyb qaadan doona howlgalka cusub ee Midowga Afrika ee Taageerada iyo Xasilinta Soomaaliya (AUSSOM), sida ay sheegeen mas'uuliyiinta gaashaandhigga.

Tababarkan rasmiga ah ee ka hor daadgureynta oo ka dhacay Dugsiga Ciidanka Lugta ee Isiolo, ayaa diiradda lagu saaray u diyaargarowga dagaalka, ilaalinta ciidanka, iyo iskaashiga ka dhexeeya shacabka iyo milatariga, si ciidanka loogu diyaariyo jawiga amni ee cakiran ee ka jira Soomaaliya.

"Ciidanka waxaa la marsiiyay dhoolatusyo lagu matalayo caqabadaha dhabta ah ee ka bixi kara goobaha dagaalka," ayuu yiri sarkiil ka tirsan gaashaandhigga Kenya oo codsaday in aan magaciisa la baahin. "Tani waxaa loogu talagalay in lagu xoojiyo go'aan qaadashada degdegga ah iyo la qabsiga xeeladaha dagaalka ee jawiga isbedbeddala."

Ciidanka Difaaca Kenya (KDF) ayaa sidoo kale xooga saaray wada-shaqeynta qeybaha kala duwan ee ciidamada caalamiga ah intii uu tababarku socday, si loo rumeeyo in guutooyinkoodu ay si habsami leh ula jaanqaadi karaan ciidamada kale ee Afrikaanka ah ee loo xilsaaray waajibaadka xasilinta ee AUSSOM.

Kenya ayaa ahayd waddan si weyn uga qeyb qaatay howlgallada nabad ilaalin dalka Soomaaliya, halkaas oo kooxda xiriirka la leedahay Al-Qaacida ee Al-Shabaab ay weli ka waddo kacdoon dhiig badan ku daatay. Kooxdan xagjirka ah ayaa inta badan weeraro gaadmo ah ku qaada ciidamada dowladda iyo kuwa caalamiga ah ee ku sugan bartamaha iyo koonfurta Soomaaliya.

GAROWE ONLINE