TPLF oo Diyaarinaysa Weerar Ballaaran oo lagu Qaadayo Saldhigyada Ciidanka Itoobiya

ADDIS ABABA – Dowladda Itoobiya ayaa ka digtay in Jabhadda Xoreynta Shacabka Tigrey (TPLF) ay isku diyaarinayso weerar milatari oo ballaaran oo ka dhan ah saldhigyada Ciidanka Difaaca Qaranka Itoobiya (EDF) ee ku yaalla waqooyiga dalka, arrintaas oo dib u soo nooleysay cabsi laga qabo inuu dib u qarxo dagaalkii burburka weyn geystay ee soo afjarmay wax ka yar afar sano ka hor.

Digniintan ayaa waxaa si rasmi ah u sheegay Taliyaha Hay’adda Sirdoonka Itoobiya, waxaana hadalkiisa ku raacay madaxweynihii hore ee maamulka Tigrey. Labada masuul ayaa sheegay inay heleen xog muujinaysa in ciidamada TPLF ay wadaan abaabul iyo isu-urursi lagu doonayo in lagu qaado weerar baaxad leh oo ka dhan ah fariisimaha ciidamada federaalka.

Sida ay sheegeen masuuliyiintu, howlgalka la qorsheynayo ayaa lagu beegsan doonaa saldhigyada ciidamada EDF ee ku sugan waqooyiga Itoobiya, halkaas oo ahayd goobtii uu ka dhacay dagaalkii laba sano socday ee u dhexeeyay ciidamada dowladda federaalka iyo xoogaggii Tigrayga. Dagaalkaas ayaa sababay dhimashada tobannaan kun oo qof iyo barakaca malaayiin kale.

Masuuliyiinta Itoobiya waxay ugu baaqeen beesha caalamka, gaar ahaan dhinacyadii ku lug lahaa geeddi-socodkii nabadda ee sanadkii 2022, inay cadaadis ku saaraan hoggaanka TPLF ee magaalada Mekelle si ay uga baaqdaan dib u qaadista hubka, isla markaana ay doortaan wadahadal iyo xal nabadeed.

Waxay sidoo kale ku eedeeyeen dalka deriska ah ee Eritrea inuu hurinayo colaadda dib u soo cusboonaan karta isla markaana door ku leeyahay sii xumaanshaha xaaladda amni ee gobolka. Sida ay sheegeen, Asmara ayaa lagu tuhunsan yahay inay gacan ka geysanayso kicinta xiisadaha sii kordhaya. Dowladda Eritrea weli si rasmi ah ugama aysan jawaabin eedeymahan.

Eedeymahan cusub ayaa imanaya xilli ay sii kordhayaan khilaafaadka siyaasadeed iyo kuwa amni ee gudaha Tigrey. Garabyada iska soo horjeeda ee TPLF ayaa isku maandhaafsan hirgelinta heshiiskii nabadda ee Pretoria, kaas oo bishii Nofeembar 2022 lagu saxiixay dhexdhexaadinta Midowga Afrika, isla markaana soo afjaray mid ka mid ah dagaalladii ugu dhimashada badnaa ee Afrika ka dhacay sannadihii u dambeeyay.

Inkasta oo heshiiska nabadda la gaaray, haddana waxaa weli taagan walaacyo la xiriira joogitaanka ciidamada ee deegaannada lagu muransan yahay, dib u dhaca hub-ka-dhigista iyo khilaafaadka ku saabsan mustaqbalka siyaasadeed ee gobolka Tigrey.

Digniinahan cusub ayaa sare u qaaday cabsida ay qabaan diblomaasiyiinta iyo hay’adaha gargaarka, kuwaas oo ka baqaya in waqooyiga Itoobiya uu mar kale galo dagaal hor leh, taasoo halis gelin karta dadaallada dib u soo kabashada iyo xaaladda bani’aadamnimo ee gobolka oo weli ka soo kabanaya raadadkii dagaalkii hore.

GAROWE ONLINE