William Ruto oo kala diray dhamaan xubnaha Golahiisa Xukuumadda

Madaxweynaha Kenya ayaa talaabadan u sababeeyay inuu soo dhisayo xukuumad sal ballaaran.

NAIROBI, Kenya - Madaxweynaha dalka Kenya William Ruto ayaa si degdeg ah xilka uga qaaday dhammaan wasiiradiisa iyo xeer ilaaliyaha guud ee dalka Kenya, sidda uu ka sheegay shir jaraa'id.

Talaabadan ayaa timid kadib dibadbaxyo ay dad badan ku dhinteen oo dhawaan dalkaasi ka dhacay, kaasoo sababay in laga laabto sharci canshuur ah "oo aan la aqbali karin".

Madaxweynaha ayaa sheegay in tallaabadan ay timid ka dib "dib u milicsi, dhegeysiga dadka Kenyaanka ah, iyo kadib markii aan qiimeyn guud ku sameeyay golaha wasiiradayda".

Ruto oo la hadlay warbaahinta maxaliga ah ayaa waxa uu sheegay in hadda wixii ka dambeeya uu la tashi ballaaran sameyn doono si loo soo dhiso dowlad sal ballaaran.

Kala dirista golihiisa wasiirada ma saameyneyso madaxweyne ku xigeenka oo aan sifo sharci ah xilka looga qaadi karin, iyo xoghayaha ra’iisul wasaaraha oo sidoo kale ah wasiirka arrimaha dibadda.

GAROWE ONLINE