Xaaladda Dalka Mali oo La Xakameeyay Kadib Weerarro Waaweyn Oo Gilgilay

BAMAKO, Mali — Hoggaamiyaha milatariga Mali, Colonel Assimi Goita, ayaa sheegay in xaaladda amni ee dalka ay “gacanta ku jirto” kadib weerarro ballaaran oo aan caadi ahayn oo dhammaadkii toddobaadka ka dhacay waqooyiga iyo bartamaha dalka, kuwaas oo si weyn u gilgilay xukunka junta-da militariga.

Goita, oo markii ugu horreysay si fagaare ah uga hadlay tan iyo weerarradii Sabtidii dhacay, ayaa khudbad uu ka jeediyay telefishinka qaranka ku sheegay in tallaabooyin amni oo dheeraad ah la qaaday isla markaana ciidamada ay wadaan howlgallo lagu sugayo amniga.

“Inta aan idinla hadlayo, qorshayaasha amniga waa la xoojiyay. Xaaladdu waa la xakameeyay, howlaha sifeynta, baaritaanka, ururinta xogta sirdoonka iyo tallaabooyinka amniga way socdaan,” ayuu yiri.

Wuxuu shacabka ugu baaqay inay ka fogaadaan kala qaybsanaanta, isagoo sheegay in Mali ay u baahan tahay “caddeyn iyo deganaansho, ee aysan u baahnayn argagax.”

Dagaalyahanno jihaadiyiin ah iyo gooni-goosato Tuareg ah ayaa wali ku sugan waqooyiga dalka saddex maalmood kadib markii ay bilaabeen weerarro isku dubbaridan oo lagu qaaday fariisimo istaraatiiji ah oo ay maamusho junta-da, oo ay ku jiraan deegaanno ku dhow caasimadda Bamako.

Weerarradan ayaa noqday kuwii ugu ballaarnaa ee Mali ka dhaca ku dhowaad 15 sano, iyadoo laba kooxood oo hore isu hayay — fallaagada Islaamiyiinta iyo gooni-goosatada Tuareg — ay markan mideeyeen weerarka ka dhanka ah xukuumadda militariga iyo taageerayaasheeda Ruushka.

Ilo caafimaad ayaa AFP u sheegay in ugu yaraan 23 qof ay ku dhinteen laba maalmood oo dagaal culus socday.

Waxaa ka mid ahaa Wasiirka Difaaca Mali, Sadio Camara, oo loo arkayay maskaxda ka dambeysay xiriirka dhow ee junta-da la yeelatay Ruushka.

Dagaallada ayaa dhex maray ciidamada dowladda iyo Jabhadda Xoreynta Azawad (FLA), oo ah koox Tuareg ah, iyo xulafadooda ka tirsan kooxda JNIM ee xiriirka la leh Al-Qaacida.

Xafiiska Goita ayaa sidoo kale sheegay in safiirka Ruushka ee Mali, Igor Gromyko, uu la kulmay madaxweynaha militariga isla markaana uu xaqiijiyay in Moscow ay sii wadi doonto taageerada Mali ee dagaalka ka dhanka ah argagixisada.

Wasaaradda Difaaca Ruushka ayaa hore u sheegtay in fallaagadu ay dib isu abaabulayaan kadib markii ay qabsadeen magaalada muhiimka ah ee Kidal ee waqooyiga saxaraha ah.

Waxay sidoo kale xaqiijisay in ciidamada calooshood u shaqeystayaasha ah ee Africa Corps ee Ruushka, kuwaas oo taageeraya junta-da Mali, lagu khasbay inay ka baxaan Kidal.

Xaaladdan ayaa dhalisay su’aalo ku saabsan awoodda junta-da ee la dagaallanka kooxaha hubeysan, inkastoo maamulka militariga uu ku adkeysanayo in istaraatiijiyaddiisa militari iyo iskaashiga shisheeye ay yareeyeen khatarta jihaadiga.

Maqnaanshaha Goita ee saddexdii maalmood ee la soo dhaafay ayaa sidoo kale sare u qaaday shakiga ku saabsan mustaqbalka hoggaankiisa, maadaama uu talada kula wareegay afgambi sanadkii 2020 isagoo ballan qaaday inuu soo afjari doono khatarta kooxaha Islaamiyiinta hubeysan.

Dhanka kale, afhayeen u hadlay kooxda JNIM ayaa muuqaal uu sii daayay Talaadadii ku sheegay inay xannibeen dhammaan waddooyinka gala Bamako.

Afhayeenkaas, Bina Diarra, ayaa sheegay in dadka doonaya inay ka baxaan caasimadda loo oggolaan doono, balse gelitaanka Bamako iyo magaalada Kati la mamnuucay “illaa amar dambe.”

Falanqeeyayaal ayaa aaminsan in weerarrada lagu qaaday agagaarka xarumaha awoodda ee dowladda ay ahaayeen xeelad lagu mashquulinayo ciidamada si loo qabsado magaalada Kidal, oo ah xarun muhiim ah oo muddo dheer ay maamulayeen fallaagada Tuareg ka hor inta aysan ciidamada dowladdu dib u qabsan sanadkii 2023.

GAROWE ONLINE