Soomaaliya iyo Turkiga: “Awooddeennu waa dunidan weyn oo aan cidlo ku noqonin”
-
Cabdiqaadir Maxamed Nuur “Jaamac” Wasiirka Difaaca Soomaaliya
- Posted On 26-10-2024, 03:41AM
MUQDISHO, Soomaaliya - Waxaan (shalay) si guul ah noogu soo idlaadey munaasabadda soo dhaweynta iyo ambabixinta markabka sahminta shidaalka ee Oruç Reis oo lagu qabtay Dekedda Xamar.
Maanta waa maalin taariikh u ah Dalka Soomaaliya iyo Türkiye. Xiriirkooda oo dib u bilowdey 2011, markuu Ra’iisul Wasaarihii waqtigaa hadana ah Madaxweynaha Dalka Türkiye Mudane Recep Tayyip Erdoğan oo booqasho rasmi ah ku yimid Soomaaliya taasoo abuurtey rajo soo celin bog cusub furtey.
13 sano kadib, safarkii saaxiibtino ee labada dal wuxuu maantana noo sidaa markab xambaarsan rajada iyo mustaqbalka labada dal.
Waxaan aad ugu rajo weynahay in Markabka Oruç Reis iyo awoodda lasocota in mustaqbalkeenna dhow iyo midka fogba uu ifaayo, anagoo dib u hanan doonna heybaddeennii qaranimo ee aan dunida ku laheyn.
“Cid walba oo wax raadisaa ma hesho, laakiin inta hesha waa kuwa raadiya” oraahdaas anagoo rumeysan ayaa shaqadeenna ku jaangoyn doonnaa hirgelinta ujeedooyinkeenna.
Waxaan kusoo gabogabeynayaa oraahdii gabyaaga Turkiga ee aheyd, awooddeennu waa dunidan weyn oo aan cidlo ku noqonin. Allaha weyn ayaa mu mahadsan inaan helney walaalo dhibka iyo dheefta nala qeybsada.
Waxaan halkaan uga mahadcelinayaa Madaxweynaha Jamhuuriyadda Federaalka Soomaaliya Mudane Dr. Xasan Sheekh Maxamuud iyo Ra’iisul Wasaaraha JFS Mudane Xamsa Cabdi Barre oo har iyo habeen u taagan sidii loo yagleeli lahaa mustaqbal ifaya, iyo Madaxweynaha Jamhuuriyadda Türkiye Mudane Recep Tayyip Erdoğan oo Soomaaliya geliyey abaal qarniyo la xusi doono.
Sidoo kale Wasiirka Tamarta Türkiye mudane Alparslan Bayraktar iyo Wasiirka Difaaca Qaranka Türkiye Mudane Yaşar Güler oo kaalin aan lasoo koobi karin ka qaatay hirgelinta guushan. Markale waxaan u mahadcelinayaa shacabweynaha Türkiye iyo Soomaaliya oo taageero u muujiyey dowladaheenna.
Walaalnimadeenna Türkiye iyo Soomaaliya ha waarto.
Fekrada qormadan kama turjumeyso siyaasada Garowe Online waxay u gaar tahy qofka ku saxiixan
