Caro ka dhalatay Xildhibaan ka hadlay hubeynta Macawiisley

Mudanaha ayaa la kulmay cambaareyn kadib markii Macawiisleyda ku tilmaamay "reer baadiyo ay kicisay caadifad qabiil".

MUQDISHO, Soomaaliya - Hadalheyn iyo caro ayaa ka dhalatay ka gadaal markii mudane ka tirsan baarlamaanka Soomaaliya uu dhaqdhaqaaqa maleyshiyaadka Macawiisley uu ku tilmaamay "mid fowdo ku bilowday".

Cabdirisaaq Aadan Warsame [Xusul] oo kasoo muuqdey barnaamij su'aallo waydiin ah ayaa rumeysan "in wax kasta oo sharci darro ku bilowday ay fawdo ku dhamaan doonan".

Mr Xusul oo aan soo hadal-qaadin magaca dagaalameyaasha Al-Shabaab ayaa si aan dhuumasho lahayn wuxuu ugu nuux-nuux-sadey in Macawiisleyda "ay kicisay caadifad qabiil oo aan loo baahneyn".

Hogaanka dowladda federaalka ah ee Soomaaliya ayuu cod dheer ugu waaniyay in ay qaataan mas'uuliyad ka saaraan "in ay Geelaleydan ka dulqaadaan dhibaatadda aan ognahay in ay haysato".

"Macawiisley dhibaatadeeda qofkan hadda dareemin berri ayuu dareemayaa," ayuu yiri. "Macawiisley waa ognahay Geelaley waaye. Waa dad miyiga ku nool, caadifad qabiil ayaa kicisay; dhibaa haysto waa ognahay laakiin dowladda ayaa la rabaa in dhibkaas ayaga haysto ay ka hortagto".

Nasiib darro iyo "taageero u muujinta" Al-Shabaab

Guddoomiyaha maamulka gobolka Hiiraan Cali Jeyte Cismaan ayaa hadalka kasoo yeeray Xildhibaan Xusul wuxuu ku tilmaamay "nasiib darro weyn iyo mid uu taageero ugu muujinayo Al-Shabaab".

Guddoonka Aqalka Hoose ee baarlamaanka federaalka ah ee Soomaaliya ayuu cod dheer ku waydiistay in ay "baaritaan sharciyadeed ay ku sameeyaan dhawaqa kasoo yeeray mudanaha".

"Madaxweynaha iyo Ra'iisul Wasaarahana ayaga ayaa iclaamiyay dagaalka Al-Shabaab; ninkaas oo kale ayaana Golaha sharci dejinta dhex fadhiya oo Al-Shabaab ah ee wax halaga qabto arintiisa," ayuu yiri Jeyte.

Xildhibaan Xusul ayaan wali ka jawaabin eedeynta iyo tafsiirka uu hadalkiisa saarey guddoomiye Jayte. Sidoo kale, guddoonka Golaha Shacabka ayaan wali ka falcelin hadalkan.

Intii uu ka qeybgalayay barnaamijka su'aallo waydiinta, Xildhibaan Xusul ayaa soo hadal-qaadey sharciga la dagaalanka argagixisada wuxuuna adkeeyay in muhiim ay tahay in degdeg loosoo saaro.

Waa kuma Xildhibaan Cabdirisaaq Aadan Xusul?

Kursiga Xildhibaanimadda ayuu ku guuleystay February 25, 2022 kadib doorasho ka dhacdey xarunta INJI magaaladda Dhuusamareeb ee caasimadda dowlad goboleedka Galmudug.

Sidda uu ku dhawaaqay guddiga doorashadda, Xusul ayaa helay 96 cod oo kamid ah ergadda. Doorashadda kursigan ayaa kamid ahayd afartii xubnood ee ugu dambeysay degaan doorashada Dhuusamareeb.

Warbixinadda ayaa tibaaxaya in Xusul uu kamid ahaa liiska saraakiisha hay'adda sirdoonka Soomaaliya shantii sano ee loo qoondeeyay in ay ku biiraan Golaha Shacabka.

Guddoomiye Jayte ayaa carabka ku dhuftey in Xusul uu horey uga mid ahaa Xisbul Islaam oo kamid ah garab kamid ah labadda kooxood ee Midowgii Maxaakiimta mar ka talin jiray Muqdisho.

Eedeynta Jayte kadib, waxaa baraha bulshadda soo galay muuqaalo iyo sawirro lagu sheegayo in uu yahay Xildhibaan Xusul isla markaana uu kamid ahaa ilaaladda Cali Dheere, afhayeenka Al-Shabaab. GO ma xaqiijin karto.

Howlgaladda "qabiileysan" ee dowladda dooneyso

La dagaalanka Al-Shabaab waa waajibaadka ugu culus ee horyaala maamulka Xasan Sheekh Maxamuud. Wallow uusan soo bandhigin qorshihiisa, haddana dildilaac ayaa soo ifbaxaya.

Talaabooyinka illaa haatan uu qaadey hogaanka dowladda federaalka ayaa muujinaya in ay isku-dayayso in ay tijaabiso howlgalo ay hogaaminayaan beelaha halkii ay ahayd in ay ciidamadda horboodaan.

Tijaabooyinkan ayaa illaa haatan kasoo muuqdey howlgalo ka dhacay gobolka Hiiraan. Xukuumadda waxay ku dhiiratay in ay ka faa'iideysato kacdoonka ay hormuudka ka yihiin maleyshiyaadka Macawiisley.

Macawiisley oo ah dadwayne iskood isku xilqaamay ayaa soo ban-baxay dabayaaqadda muddo xileedka maamulkii hore ee Maxamed Cabdullaahi Farmaajo ee looga adkaadey doorashaddii dhacdey 15-ka May.

Warar madax-banaan ayaa sheegay in hogaanka dowladda federaalka uu wadahadalo kula jiro beelo ku nool gobolka Shabeellaha Dhexe si ay dhankooda u bilaabaan kacdoon shacab oo ka dhan ah ururka Al-Shabaab.

GAROWE ONLINE