Ciidamada Kenya oo raadinaya xubno Al-Shabaab weerar fuliyay

Dableydan oo tiradooda ay gaareyso ugu yaraan 20 ruux ayaa la sheegay in ay usoo baxsadeen dhanka Soomaaliya.

NAIROBI, Kenya - Saraakiisha ammaanka ee Mandheera ayaa ku raad jooga ugu yaraan 20 qof oo looga shakisan yahay in ay ka tirsan yihiin Al-Shabaab, sidda ay warisay saxaafada.

Dagaalameyaashan la tuhunsan yahay in ay gacan-saar la leeyihiin xoogaga taabacsan Al-Qaacida ayaa weerar ku qaaday xero boolis oo ku taalla deegaankaas ka hor inta aysan baxsan.

Maleeshiyada oo aad u hubeysan ayaa la sheegay in subaxnimadii Jimcaha ay ku soo dhawaadeen Xerada Quick Response Unit (QRU) ee Ciidanka Birmadka ee Waqooyi Galbeed.

Dabley ayaa, sidda ku xusan xogta ay bixiyeen laamaha ammaanka Kenya, waxay ka soo rasaaseeyeen xerada meel 100 mitir u jirta ka hor inta aan la iska caabin.

Dhacdadan ugu dambeysay ayaa timid kadib weeraro is xigxigay oo inta badan lala beegsaday xeryo boolis oo ku yaala deegaankaas oo ay fuliyeen kooxo isku mid ah.

Bishii Agoosto, saraakiishu waxay fashiliyeen isku day weerar oo ka dhacay xerada Elram oo ay maamulayeen saraakiil ka tirsan guutadda ASTU ee ka hortagga argagixisadda.

Kororka weerarada argagaxisada ah ee ka dhacaya waddanka Kenya gaar ahaan gobolka Waqooyi Bari ayaa yimid kadib markii ciidamada Kenya ay gudaha u galeen Soomaaliya sanadkii 2011-kii.

GAROWE ONLINE