Shirkado loogu ganaaxay $1.8 bilyan fariimo lagu diray WhatsApp

Fariimahan ayaa waxaa diray shaqaalaha shirkadahan laga bilaabo Janaayo 2018 ilaa Sebtembar 2021.

WASHINGTON, US - Qaar ka mid ah shirkadaha ugu waaweyn Wall Street ayaa lagu ganaaxay lacag dhan $1.8bn (£1.7bn) kadib markii shaqaalahooda ay heshiisyo iyo ganacsiyo uga hadleen isgaarsiintooda gaarka ah.

Guddiga Amniga iyo Sarrifka (SEC) ee hay'adaha dabagalka dhaqaalaha Mareykanka ayaa sheegay in baaritaanku uu daaha ka rogay "isgaarsiin ka baxsan kanaalka rasmiga ah".

Barclays, UBS iyo Goldman Sachs oo kamid ah shirkadaha waaweyn ee xarunta ganacsiga caalamka ee Wall Street ayaa ka mid ahaa 16-ka shirkadood ee ay magacaabeen maamulayaasha.

Dabagalka shirkadahan waaweyn waa kiis taariikhi weyn u noqon doona waajibaadka shaqo ee guddiga SEC iyo Komishanka Ganacsiga Mustaqbalka Badeecadaha (CFTC).

SEC ayaa qoraal ay soo saartey Talaadadii waxay ku dhawaaqday ganaax dhan $ 1.1bn, halka Guddiga Ganacsiga Mustaqbalka Badeecadaha uu sheegay inay soo rogeen $710m oo ganaax ah.

Laga bilaabo Janaayo 2018 ilaa Sebtembar 2021, shaqaalaha bangiyadu waxay si joogta ah ugu wadahadlaayeen arrimaha ganacsiga asxaabtooda, macaamiisha iyo la-taliyeyaasha kale ee saddexaad iyagoo isticmaalaya WhatsApp.

Shirkadaha ma aysan ilaalin inta badan wadasheekeysigaas, kuwaas oo ku xad-gudbay xeerarka federaalka ee looga baahan yahay dillaaliinta iyo hay'adaha kale ee maaliyadeed in ay dhowraan si loo badbaadiyo ganacsiyadooda.

GAROWE ONLINE