30 qof oo ku dhintay Qaraxyo ka dhacay dalka Iraq
-
- Posted On 22-12-2016, 11:18PM
Ugu yaraan 30 ruux ayaa ku geeriyootay, 60 kalena way dku dhaawacmeen qaraxyo ismiidaamin ah, oo ka dhacay magaalada Mosul, ee waqooyiga dalka Iraq.
Qaraxyada oo ahaa kuwa is-xigay ayaa waxay ka kala dhaceen dhowr goobood, oo uu kamid ah Garoon kubadda lagu ciyaaro oo ay degan yihiin ciidanka Iraq.
Goobaha sidoo kale weerarada ay ka dhaceen ayaa waxaa ku jira Masaajid iyo Suuq, sida laga soo xigtay Saraakiisha amniga dowladda Iraq.
Ururka Daacish ayaa sheegtay mas'uuliyadda weerarada ka dhacay Mosul.
Askar katirsan ciidamada la-dagaalanka argagaxisada dowladda Iraq iyo dad shacab ah ayaa la sheegay inay ku jiraan shakhsiyaadkii khasaaruhu kasoo gaarey qaraxyada magaalada Mosul.
Ciidamada dowladda Iraq ayaa dhawaan galay qeybo kamid ah Mosul kadib dagaal qaatay muddo labo bilood ah, oo ay kula galeen magaaladaasi xoogag Daacish katirsan.
Magaalada Mosul waxaa qeybo aad u badan, oo kamid ah wali ku jirtaa gacanta Daacish, waxaana ay ku dhabar-adaygayaan inay iska caabiyaan xoogaga dowladda Iraq.
GAROWEONLINE
