Ammaanka Hong Kong oo la adkeeyay
-
- Posted On 17-05-2016, 01:25PM
In kabadan 6000 oo askari bilays ah ayaa la howl galiyay iyadoo laga cabsi qabo dibaxyo ka dhaca Jaziiradda Hong Kong ee dalka Shiinaha, waxaana arrintaasi timi kadib markii uu booqashadii ugu horaysay 2 sano ka bacdi uu ku tagay sarkaal sare.
Zhang Dejiang oo ah mas'uulka Shiinaha u qaabilsan arrimaha gobolka Hong Kong, ayaa socdaalkiisu salka ku hayaa qaabkii xal looga gaari lahaa muranka ka taagan rabitaanka shacabka ee dimuqraadiyadda.
Dejiang, oo warbaahinta la hadlay ayaa sheegay inay qaadi doonaan aragtida shacabka sidaasina tahay ujeedka safarkiisa.
Booqashada sarkaalkan ayaa dhinaca kale ku soo beegantay iyadoo dadka Jaziiraddu aad uga biyo diidsanyihiin faro galinta Beijin ee maamul hoosaadka Hong Kong.
Sarkaalkan oo qaadan doona booqasho saddex maalmood ah, ayaa la filayaa inuu khudbad ka jeediyo shir looga hadlayo dhaqaalaha dalkaasi.
Wuxuu sidoo kale la kulmi doonaa Xildhibaanada dimuqraadiyadda u ololeeya.
GAROWEONLINE
