Ciidamada Mareykan ah oo lagu amray inay ka baxaan saldhigga Al Udeid, Qatar

Doha – Qaar ka mid ah ciidamada Mareykanka ayaa lagu wargeliyay in ay ka baxaan saldhigga cirka ee Al Udeid ee Qatar ugu dambeyn Arbaco fiidnimo, sida ay soo sheegtay wakaaladda wararka Reuters, iyadoo tixraacaysa seddex diblomaasiyiin.

Warbixinta ayaa ku soo beegmaysa iyadoo Mareykanka uu digniin ka bixiyay in uu faragelin karo dibadbaxyada haatan ka socda dalka Iiraan.

“Waxaa tani tahay isbeddel joogto ah oo aan ahayn amarka baxsiga,” ayuu yiri mid ka mid ah diblomaasiyiinta, isagoo intaa ku daray in aysan jirin sabab gaar ah oo loo sheegay isbeddelkan.

Safiirka Mareykanka ee Doha kama jawaabin warbixinta, halka Al Jazeera ay la xiriirtay Wasaaradda Arrimaha Dibadda ee Qatar si ay faallo uga bixiso.

Saldhigga Al Udeid ayaa ah kan ugu weyn ee Mareykanka ka leeyahay Bariga Dhexe, waxaana ku sugan ku dhawaad 10,000 oo askari.

Sannadkii hore, ka hor inta aan Mareykanka fulin duqeymo cirka ah oo ka dhan ah Iiraan, qaar ka mid ah shaqaalaha iyo qoysaskooda ayaa laga guuriyay saldhigyada Mareykanka ee Bariga Dhexe. Kadib duqeyntii Mareykanka ee bishii Juun, Iiraan ayaa weerar gantaal ku qaaday saldhiggan Qatar.

Sarkaal sare oo Iiraan ah ayaa horay sheegay in Tehran ay digniin siisay dalalka gobolka, taasoo ku saabsan in ay bartilmaameedsan doonto saldhigyada Mareykanka haddii Washington weerar ku qaaddo.

Saldhiggan oo cabirkiisu yahay 24 hektar (59-acre), kuna yaal lamadegaanka ka baxsan caasimadda Doha, ayaa ah xarunta hore ee Taliska Dhexe ee Mareykanka (US Central Command), kaasoo maamula howlgalada milatari ee dhul ballaaran oo ka bilaabma Masar ilaa Kazakhstan.

GAROWE ONLINE