Geerida Kayla Mueller oo la xaqiijiyey
-
- Posted On 11-02-2015, 05:17AM
February 11, 2015 (GO)- Dowlada Maraykanka ayaa xaqiijisey geerida haweeney u dhalatay dalka Maraykanka taasoo in muddo ah u afduubneyd kooxda IS balse todobaadkii hore kooxdaasi shaacisey inay ku dhimatey duqeyn dhanka cirka ah oo diyaaradaha Jordan geysteen.
War-saxaafadeed kasoo baxay Aqalka Cad ayaa lagu sheegay in Maraykanku baaritaan kadib xaqiijiyey warka sheegaya geerida haweeneydaas oo ka shaqeyneysey arimaha samafalka.
War-saxaafadeedka waxaa sidoo kale lagu sheegay in Maraykanku xaqiijin karin in haweeneydaas lagu diley duqeyn diyaaradaha Jordan geysteen iyo in kooxda IS khaarijisey.
Kayla Mueller oo 26 jir ahayd taaso laga soo bilaabo sanadkii 2011 ka shaqeyneysey arimaha samafalka, waxaa bishii August ee sanadkii hore laga afduubtey magaalada Aleppo ee dalka Syria.
Madaxweynaha Maraykanka Barack Obama ayaa cambaareeyey dilka Mueller isagoo sheegay in cadaaladda la hor keeni doono kuwii diley.
GAROWE ONLINE
