Hogaamiyaasha Yurub oo indhaha ku hayo Kulanka Trump iyo Putin ee ka dhacaya Alaska
-
- Posted On 13-08-2025, 12:54PM
Alaska, Ogoosto 13, 2025 – Madaxweynaha Mareykanka Donald Trump iyo Madaxweynaha Ruushka Vladimir Putin ayaa la filayaa inay ku kulmaan gobolka Alaska, iyadoo kulankooda lagu wado inuu diiradda saaro sidii loo dhammeyn lahaa dagaalka ka socda Ukraine – balse waxa muuqata in labada dhinacba ay leeyihiin yoolal si weyn isugu khilaafsan.
Inkasta oo Ruushka iyo Ukraine ay marar badan muujiyeen rabitaankooda ku aaddan in dagaalka la soo afjaro, haddana mid kasta waxa uu doonayaa wax uu kan kale si adag uga soo horjeedo.
Madaxweyne Trump ayaa Isniintii sheegay inuu "isku dayi doono in dib loogu soo celiyo Ukraine qaar ka mid ah dhulalka ay Ruushku haystaan", hase yeeshee waxa uu xusay in laga yaabo "in is-weydaarsi dhulal ah" uu dhaco si loo gaaro xal nabadeed.
Balse Madaxweyne Volodymyr Zelensky oo ah hoggaamiyaha Ukraine ayaa si cad uga hor yimid fikraddaas, isagoo sheegay in dalkiisu marnaba ogolaan doonin in la siiyo Ruushka wax dhul ah, gaar ahaan gobollada uu horey u qabsaday sida Crimea.
“Ma abaal marin doono Ruushka fal-dembiyeedkiisii,” ayuu yiri Zelensky, isagoo adkeeyay mowqifka Ukraine ee ah in la soo celiyo dhammaan dhulalka la haysto.
Dhanka kale, Madaxweyne Putin ayaa weli ku dheggan dalabkiisii ahaa in Ukraine noqoto dal aan dhex dhexaad ahayn, ay yareyso ciidamada qalabka sida, isla markaana uu Ruushku sii haysto dhulalka uu qabsaday.
Ruushka ayaa weerarkiisa buuxa ku qaaday Ukraine sannadkii 2022, isagoo ku andacoonaya in xulafada NATO ay Ukraine u adeegsanayaan inay ciidamo kusoo dhowaadaan xuduudaha Ruushka – arrin uu Putin si weyn uga cabsi qabo.
Kulanka Alaska ayaa noqonaya fursad cusub oo diblomaasiyadeed, balse lama oga in labada dhinac ay wax horumar ah ka gaari doonaan mawduuca muranka badan dhaliyay ee dagaalka Ukraine.
GAROWE ONLINE
