Jordan oo u yeertay safiirkeeda Israel xili ay xiisad culus jirto

AMMAAN, Jordan – Dowladda Carbeed ee Jordan ayaa waxay u yeeratay safiirkeeda u jooga magaaladda Tel Aviv ee caasimadda Yahuuda.

Wasaaradda Arrimaha Dibadda ayaa war-saxaafadeed ku shaacisay in talaabadan la xiriirto xarig aan sabab lahayn oo ka dhan ah muwaadiniinteeda.

Bayaanka ayaa lagu dalbaday in xorriyadooda sida ugu dhaqsiyaha badan loogu soo celiyo muwaadiniintaas "sharci daradda lagu haysto".

Ayman al-Safadi, wasiirka wasaaradda, ayaa tibaaxay in ay danjirahooda ay wadatashiyo la yeelan doonan kadib go’aan qaadan doonan.

"Muwaadiniinteena lagu qabtay xariga maamulka ka yimid ayaa qaarkood wajahaya xaalad caafimaad oo liidata," ayuu raaciyay.

Jordan ayaa qaadi doonto talaabadda ugu wanagasan oo dhanka diblumaasiyadda si muwaadiniinteeda dib ugu soo celiso dalkooda, ayuu ku daray.

Israel ayaa bilooyinkii lasoo dhaafay waxay siyaabo kala duwan xabsiga ugu taxaabeysay muwaadiniin kasoo jeeda dalal kala duwan.

Mas'uuliyiinta ayaa ku eedeeyay dadkaas in ay qaab sharci darro ah kusoo galeen dhulka Yahuuda, wallow eedeymahaas ay beeniyeen wadamadooda.

Talaabadaas ayaa xiisad diblumaasiyadeed waxay ka dhex-qarxisay wadamada qaarkood, waxaana kamid ah Jordan oo safiirkeeda kala baxay Israel.

AROWE ONLINE