Kiir iyo Machar oo Juba ku dagaallamay
-
- Posted On 10-07-2016, 04:04PM
Dagaal xooggan ayaa ciidammo kala taabacsan madaxweyne Salva Kiir iyo ku xigeenkiisa Riek Machar ku dhexmaray caasimadda Juba ee South Sudan.
Ciidanka Machar ayaa sheegay in fariisimahooda ay kusoo weerarreen kuwa madaxwyne Kiir.
Dagaalka ayaa saaka xooggiisa ka dhacay xarunta Qaramada Midoobay ay ku leedahay caasimadda Juba iyo weliba agagaarka garoonka diyaaradaha.
Lama sheegin inta uu la egyahay khasaaraha ka dhashay dagaalka.
Qaramada Midoobay ayaa labada dhinac ku dhaliishay in aanay ilaalin heshiiska nabadda, ee lagu soo afjarayay colaadda sokeeye ee dalkaasi ka jirtay labadii sano ee lasoo dhaafay.
Heshiiska awgii ayaa tiro kooban oo ka tirsan xooggaga Mr Machar waxa ay ku laabteen Juba, walow aan weli lagu dhafin ciidanka dowladda.
Maraykanka ayaa muwaadiniintiisa ku sugan Juba ugu baaqay in taxadaraan, isla markaana aanay dibedda u bixin.
BBC
