Labada hogaamiye ugu da'da yar Madaxda Carab oo kulmaya

RIYASH - Hogaamiyaha Suuriya, Axmed al-Sharaa, oo la magacaabay madaxweynaha dowladda kumeelgaarka ah todobaadkii hore, ayaa qorsheynaya inuu booqdo Sacuudiga Maanta, taasoo noqonaysa safarkiisii ugu horeeyay ee dibadda kadib markii uu xilka qabtay, oo la riday Bashaar Al-Asad.

Ilo ku sugan Suuriya ayaa u sheegay Al Jazeera Sabtidii in Axmed al-Sharaa uu ku sugnaan doono Sacuudiga laba maalmood, waxaana la filayaa inuu kala hadlo Maxamed Bin Salmaan xoojinta xiriirka labada dal. Magacaabista Axmed al-Sharaa ayaa timid kadib markii xoogagga mucaaradka talada Suuriya lawareegeen bishii Diseembar ee 2024.

Sida madaxweynaha, Axmed al-Sharaa sidoo kale waxa uu ogolaaday in la sameeyo gole sharci-dejin kumeel gaar ah oo shaqeyn doona marxaladda kumeelgaarka ah ilaa dastuur cusub la ansixiyo.

Boqorka Sacuudiga, Salman bin Abdulaziz, iyo Dhaxal-sugaha Maxamed bin Salman ayaa farriimo hambalyo ah u diray al-Sharaa kadib magacaabistiisa madaxweynaha, iyagoo u rajeeyay guul.

Bishii hore, Axmed al-Sharaa ayaa u sheegay Al Arabiya TV in Sacuudigu “si dhab ah uga qayb qaadan doono mustaqbalka Suuriya,” isagoo tilmaamay “fursad maalgashi oo weyn oo dhammaan dalalka deriska ah.”

GAROWE ONLINE