Madaxii Jabhadda STC ee Yemen oo u baxsaday Imaaraadka Carabta, isagoo sii maray Somaliland

ADEN- Isbahaysiga uu hoggaamiyo Boqortooyada Sucuudiga ee ka hawlgala dalka Yemen ayaa shaaciyey war muran dhaliyey oo ku saabsan dhaq-dhaqaaqii ugu dambeeyey ee hoggaamiyaha Golaha Kala-guurka Koonfurta Yemen (STC), Cidarous Al-Zubaidi. Sida ay sheegeen, Al-Zubaidi ayaa si lama filaan ah uga maqnaaday wada-hadallo nabadeed oo loogu yeeray magaalada Riyadh, isagoo doortay inuu dalka ka baxo goor habeenimo ah.

Wararka isbahaysigu bixiyey ayaa tilmaamaya in Al-Zubaidi uu ka ambabaxay magaalada Cadan, halkaas oo uu doon ka raacay kuna gaaray dekedda Berbera. Intaas kadib, ayuu raacay diyaarad ay la socdeen saraakiil ka tirsan Imaaraadka Carabta, taas oo u duushay caasimadda Soomaaliya ee Muqdisho. Safarkaasi, sida la sheegay, wuxuu ugu dambayn ku dhammaaday Abu Dhabi, iyadoo diyaaradda la tuhunsan yahay inay inta safarka ku jirtay damisay nidaamkeeda aqoonsiga hawada, arrintaas oo dhalisay shaki dheeraad ah.

Tallaabadan, haddii la xaqiijiyo, waxay sii hurin kartaa khilaafka hoose ee u dhexeeya Sucuudiga iyo Imaaraadka Carabta, kaas oo bannaanka u soo baxay dabayaaqadii sanadkii hore, kadib markii STC — oo taageero ka helaya Abu Dhabi — ay weerarro ku qaadday ciidammada dowladda Yemen ee ay Riyadh taageerto.

Golaha STC, oo hore ula safnaa dowladda Yemen ee caalamku aqoonsan yahay dagaalka ay kula jireen fallaagada Xuuthiyiinta ee waqooyiga dalka, ayaa muddooyinkii dambe si cad u muujinayey rabitaankiisa ah in la dhiso dowlad madax-bannaan oo ka hanaqaadda koonfurta Yemen. Ololihii ay kula wareegeen gobollada Hadramout iyo Mahra, oo xuduud la leh Sucuudiga, ayaa si gaar ah u kiciyey walaac amni oo Riyadh ay ku tilmaantay “khad cas”.

Isbahaysiga Sucuudiga hoggaamiyo ayaa jawaab uga bixiyey arrintaas duqeymo cirka ah oo ka dhacay dekedda Mukalla dhammaadkii Diseembar, iyagoo bartilmaameedsaday waxa ay ku sifeeyeen shixnad hub ah oo xiriir la leh Imaaraadka. Abu Dhabi ayaa eedeymahaas si cad u beenisay, iyadoo isla maalintaas ku dhawaaqday inay soo gabagabeysay hawlgal ay ugu magac dartay “la-dagaallanka argagixisada” ee Yemen.

Inkasta oo ciidammada dowladda Yemen, oo helaya taageero cirka ah oo Sucuudi ah, ay dib ula wareegeen Hadramout iyo Mahra, isla markaana STC ay ballanqaadday ka-qaybgalka wada-hadallada nabadeed, haddana isbahaysigu wuxuu sheegay in Al-Zubaidi uusan ka mid ahayn wafdigii ay diyaarada Yemen Air u qaaday Riyadh.

Arrintan ayaa muujinaysa sida uu u sii adkaanayo is-fahamka dhinacyada ku lugta leh colaadda Yemen, isla markaana ay u sii fogaanayaan dadaalladii lagu doonayey in miiska wada-hadallada lagu xalliyo khilaafka siyaasadeed ee dalkaas.

GAROWE ONLINE