​Maraykanka: Toogasho ka dhacday nawaaxiga Aqalka Cad

WASHINGTON- Rasaas goos goos ah ayaa caawa laga maqlay nawaaxiga Aqalka Cad ee looga taliyo dalka Maraykanka sida ay xaqiijiyeen Boliiska waddankaas oo tilmaamay inay u dhaxaysa ilaalada xaruntaas iyo qof hubaysnaa.

Xabadahaasi ayaa lagusoo waramayaa inay ka dhaceen galbeedka Aqalkaas.

Booliska ayaa u sheegay taleefishinka ABC News in mid ka mid ah ilaalada madaxtooyada uu nin hubaysan ku toogtay bar koontorool oo u dhaw dhismaha.

Arrintaasi ayaa kilftay in albaabada loo laabo Aqalka Cad, taasi oo ilaa hadda faah faahin dheer laga bixin balse loo malaynayo inay loo xiray xaalad amni.

Madaxweyne Barack Obama ayaa ka maqan Aqalka Cad oo ciyaarta golf-ka loo yaqaan ayuu ku dheelayaa deegaanka Maryland.

Rasaasta ayaa hadda istaagtay, waxaana socda baaritaano ku aadan qofka la toogtay iyadoo ammaanka xarunta aad loo adkeeyay

GAROWEONLINE