Obama iyo ku-xigeenkiisa oo booqday Orlando
-
- Posted On 17-06-2016, 07:16PM
Madaxweynaha dalka Mareykanka Barack Obama iyo kuxigeenkiisa Joe Biden ayaa booqday magaalada Orlando ee Gobolka Florida, kaasoo dhawaan ka dhacay weerar lagu laayay 50 ruux oo ku jiray baar lagu caweeyo.
Booqashada mas'uuliyiinta ugu sarraysa dalka USA, ayaa ku saabsanayd sidii ay murugada ula qaybsan lahaayeen ehelada iyo shacabka ku dhaqan magaalada Orlando.
Labada hogaamiye, ayaa ubax dhigay goob la isugu keenay obaxyo cas cas iyo sawirro qaar kamid ah dadkii goobtaasi lagu laayay.
Hadallo ay jeediyeen Obama iyo Biden, waxay ku tilmaameen weerarkaasi midkii ugu xumaa ee dalkaasi soo maray iyagoo tacsi u diray dhammaan ehelada dadkii lagu laayay baarkaasi.
Madaxweyne Obama ayaa ku baaqay isku duubni iyo in si wada jir ah looga hortago falalkan oo kale.
Weerarka Orlando ayaa waxaa sheegatay kooxda ISIS iyadoo uu fuliyay nin asal ahaan kasoo jeeda dalka Afghanistan kaasoo weerarka kahor labo jeed ay waraysteen ciidamada FBI-da.
GAROWEONLINE
