Pakistan: 60 ruux oo lagu dilay magaalada Quetta
-
- Posted On 25-10-2016, 01:07PM
QUETTA, Pakistan- Koox hubaysan oo aan ilaa hadda haybtooda la aqoonsan ayaa weerar khasaaro badan dhaliyay ka gaysatay magaalada Quetta ee dalka Pakistaan.
Weerarka oo lagu qaaday saldhig lagu tababaro ciidamo Booliis ah, ayaa waxaa ku geeriyooday 60 qof oo kamid ahaa ciidamadii la carbinayay iyo dhowr ilaalo ah.
Waxaa falkaas sidoo kale lagu dhaawacay in kabadan 100 ruux.
Mallayshiyada weerartay magaalada ugu weyn gobolka Baluchistan ee Koonfurta dalka Pakistan, ayaa sidoo kale qafaalatay qaar kamid ah ciidamadii dibowga ku jiray.
Ilaa haatan ma jirta cid sheegatay mas'uuliyadda weerarkaasi.
Sarkaal sare oo ka tirsan laamaha ammaanka dalkaasi ayaa BBC-da u sheegay in uu rumeysan yahay in ragga weerarka soo qaaday laga soo hagayay gudaha dalka Afqaanistaan.
Howlgalkaas, ayaa qaatay dhowr saacadood, waxaana markii dambe Booliisku sheegeen inay tallaabadaas lagu guulaystay.
Kooxo katirsan mintidiinta Islaamiga ah iyo ururro fallaago ah ay kal hore halkaasi ka gaysteen weerarro noocan oo kale ah.
Labo bilood ka hor, 70 qof ayaa lagu dilay weerar ka dhacay cusbital ku yaalla magaaladaasi Quetta.
GAROWEONLINE
