Puntland iyo AFRICOM oo ka wada hadlay saldhig Maraykan laga dhisayo Boosaaso iyo amniga xeebaha

BOOSAASO, (GO) — Madaxweynaha Puntland Siciid Cabdullaahi Deni ayaa magaalada Boosaaso kula kulmay saraakiil sare oo ka tirsan Taliska Ciidamada Maraykanka ee Afrika (AFRICOM), iyadoo labada dhinac ay ka wada hadleen ballaarinta iskaashiga amniga, la-dagaallanka argagixisada iyo sugidda xeebaha Puntland.

Wafdiga Maraykanka waxaa hoggaaminayey Taliyaha Hawlgallada Gaarka ah ee Maraykanka ee Bariga Afrika, Colonel James Rose.

Sida ay sheegtay Madaxtooyada Puntland, kulanka waxaa si gaar ah looga hadlay dardargelinta dhismaha saldhig Maraykanku ku yeelanayo Boosaaso iyo iskaashiga hawlgallada ka dhanka ah Daacish iyo Al-Shabaab ee ku dhuumaaleysanaya buuraleyda Calmiskaad iyo Calmadow.

Labada dhinac ayaa sidoo kale ka wada hadlay la-dagaallanka burcad-badeedda iyo horumarinta tababarrada Ciidamada Difaaca Puntland, xilli ay soo kordhayaan walaacyada amni ee ka jira xeebaha gobolka.

Kulankan ayaa imanaya iyadoo dowladda Turkigu weerarro ka geysaneyso xeebaha Soomaaliya, iyada oo aan wax xiriirin iyo wada-shaqeyn ah la sameyn dowlad-goboleedyada federaalka, gaar ahaan Puntland oo maamusha xeeb dhererkeedu gaarayo qiyaastii 1,600 kiiloomitir.

Xaaladdan ayaa sare u qaadaysa su’aalo ku saabsan cidda awoodda u leh isku-dubbaridka hawlgallada militari ee ka dhacaya xeebaha, ilaalinta shacabka iyo habka dowladaha shisheeye ula macaamilayaan maamullada sida tooska ah u maamula deegaannada ay hawlgalladu ka dhacayaan.

Puntland ayaa hore u adkaysay in hawlgallada amniga badda, la-dagaallanka burcad-badeedda iyo duqeymaha ka dhacaya dhulkeeda iyo xeebaheeda aysan noqon karin kuwo laga fuliyo iyada oo aan maamulka lala socodsiin ama lagala shaqeyn.

Madaxweyne Deni waxaa kulanka ku wehliyey xubno ka tirsan Golaha Xukuumadda Puntland, la-taliyeyaal, Agaasimaha Guud ee Madaxtooyada iyo saraakiil ciidan.

GAROWE ONLINE