Puntland iyo Mareykanka oo howlgal ka dhan ah Al-Shabaab ka fuliyay buuraha Cal Madow

GAROWE — Dowladda Puntland iyo Mareykanka ayaa xaqiijiyey howlgal ka dhan ah Al-Shabaab oo lagu bartilmaameedsaday goob ay kooxdaasi hub iyo rasaas ku kaydin jirtay deegaanka Markad, oo ka tirsan buuraha Cal Madow ee gobolka Sanaag.

Howlgalka ayaa lagu fuliyey iyadoo la kaashanayo oo lala kaashanayo hay’adaha amniga Puntland. Sida lagu sheegay xogta la bixiyey, goobta la beegsaday waxaa loo adeegsan jiray kaydinta hub iyo saanad militari oo loogu talagalay taageeridda howlaha Al-Shabaab iyo weerarrada ka dhanka ah shacabka Puntland iyo Soomaaliya.

Taliska ciidamada la dagaallanka Al-Shabaab ee Puntland ayaa sheegay in howlgalka uu kooxda gaarsiiyey khasaare culus. Hase yeeshee, illaa hadda ma jirto faahfaahin rasmi ah oo madax-bannaan oo xaqiijinaysa tirada xubnaha lagu dilay ama baaxadda khasaaraha soo gaaray kooxda.

Sidoo kale, lama shaacin tirada hubka iyo rasaasta lagu burburiyey goobta, halka faahfaahinta farsamo ee ku saabsan nooca weerarka aan si rasmi ah loo shaacin.

Buuraha Cal Madow ayaa muddo dheer ahaa deegaan ay kooxaha hubeysan ku leeyihiin saldhigyo iyo goobo ay ku dhuuntaan. Warbixinno Qaramada Midoobay ah ayaa hore u sheegay in Al-Shabaab ay saldhig ku leedahay qaybta galbeed ee buuraha Cal Madow, halka ISIS-Somalia ay ka hawlgasho qaybo kale oo ka mid ah buuraha Golis iyo Cal Miskaad.

Mareykanka ayaa sannadkan si joogto ah uga fuliyey duqeymo ka dhan ah kooxaha hubeysan ee ku sugan Puntland. Xogta Taliska Mareykanka ee Afrika (AFRICOM) waxay muujinaysaa in inta badan duqeymaha Mareykanka ee buuraha Golis sanadkan lagu bartilmaameedsaday ISIS-Somalia, halka duqeymo kale lagu qaaday Al-Shabaab meelo ka tirsan koonfurta Soomaaliya. 

Howlgalkan cusub ayaa kusoo beegmaya xilli Puntland ay sii waddo howlgallada amni ee ka dhanka ah kooxaha hubeysan ee ku sugan dhulka buuraleyda ah, iyadoo Mareykankuna uu taageero ka siinayo dhinaca hawlgallada cirka.

GAROWE ONLINE